Policia e Tiranës ka arrestuar autorin e ngjarjes së sotme të ndodhur paradite në Laprakë, ku u vendos një sasi tritoli në hyrje të banesës së Gjergji Llazi. Me anë të një njoftimi për mediat Policia njofton se është bërë arrestimi i autorit të vendosjes së tritolit, që është një 26-vjeçar.
Ëngjëll Myslimi, ka pranuar autorësinë e ngjarjes dhe është shprehur se shkaku i vendosjes së lëndës eksplozive ka qenë një konflikt që ai kishte patur me djalin e të zotit të banesës.
Sipas policisë, mësohet se 47-vjeçari Llazi është person me precedent në fushën e vjedhjeve të makinave, ndërsa djali i tij njihet nga uniformat blu si përdorues i lëndëve narkotike. Lëvizjet e autorit të kësaj ngjarje, u fiksuan nga një kamer sigurie, pranë banesës që jetonte familja Llazi.
Në momentin e shpërthimit, në banesë ndodheshin 4 persona, çifti i bashkëshortëve, si dhe dy fëmijët e tyre, një djalë e një vajzë. Në një reagim për mediat, kryefamiljari, mohoi të ketë dijeni për rrethanat e kësaj ngjarje, me pretendimin se nuk ka pasur kërcënime apo konflikte me ndonjë person.
Njoftimi i policisë
Tiranë
Zbardhet në kohë rekord ngjarja e ndodhur në orët e para të mëngjesit të sotëm, në rrugën “Tahir Sinani”, ku shpërtheu një sasi lënde eksplozive në derën e jashtme të banesës së shtetasit Gj. Ll.
Pas një pune intensive, profesionale dhe hetimore u bë i mundur identifikimi, lokalizimi, kapja dhe arrestimi i autorit të dyshuar të kësaj ngjarjeje.
Vihet në pranga 26-vjeçari.
Menjëherë pas ngjarjes së ndodhur në orët e para të mëngjesit të sotëm, në rrugën “Tahir Sinani”, në derën e jashtme të banesës së shtetasit Gj. Ll., ku shpërtheu një sasi lënde plasëse duke shkaktuar dëme materiale, specialistët për Hetimin e Krimit në Komisariatin e Policisë Nr. 3 vijuan punën intensive për zbardhjen e ngjarjes.
Si rezultat i veprimeve profesionale dhe punës intensive të pandërprerë hetimore të bërë nga specialistët për Hetimin e Krimit në Komisariatin e Policisë Nr. 3 u bë e mundur zbardhja e ngjarjes, identifikimi, lokalizimi, kapja dhe arrestimi i autorit të dyshuar E. M., 26 vjeç, banues në Tiranë.
26-vjeçari ka pranuar autorësinë dhe është shprehur se shkaku i vendosjes së lëndës eksplozive ka qenë një konflikt që ai kishte patur me djalin e të zotit të banesës.
Materialet do t’i referohen Prokurorisë së Rrethit Gjyqësor Tiranë, për veprën penale “Shkatërrim i pronës me eksploziv”.
