Gjykata e Posaçme ka bërë rivlerësimin e masës së sigurisë dhe ka lënë përsëri në burg dy autorët e dyshuar si vrasësit e dy vëllezërve Haxhia në Durrës.
Altin Ndoci dhe Klevis Alla, janë të dyshuarit kryesorë të vrasjes që ndodhi në Durrës pak muaj më parë.Dhe ka qenë Klevis Alla ai që ka pranuar të bashkëpunojë me policinë e Durrësit, duke treguar mënyrën se si kanë kryer vrasjet, vendin e hedhjes së armëve, braktisjen e makinës së krimit dhe emrat e personave që kanë marrë pjesë në vrasje.
Më pas ka qenë përsëri Alla personi kryesor që ka çuar hetimet drejt kapjes së autorit kryesor, Altin Ndocit.
Altin Ndoci dhe Klevis Alla akuzohen për vrasjen e vëllezërve Besmir dhe Viktor Haxhia në Nishtulla të Durrësit.
Gjithashtu këta persona akuzohen edhe për atentatin ndaj Dorian Shkozës dhe Anxhelo Avdisë më 2 mars të këtij viti.Sipas policisë, dy atentatet kanë lidhje me prishjen e pazareve të drogës.
Kujtojmë se Viktor dhe Besmir Haxhia janë ekzektuar me armë zjarri në zonën e Nishtullës pasditen e 27 prillit, pasi kanë përshkruar rrugën nga Universiteti “Aleksandër Moisiu” për në tregun e makinave në qytet, ku edhe janë qëlluar me breshëri kallashnikovi nga ana e atentatorëve.
Policia fal gabimeve të autorëve të ngjarjes arrestoi dy persona dhe shpalli në kërkim dy të tjerë.
