Parlamenti Europian publikon sërish apelin e 3 eurodeputetëve për qeverinë shqiptare i cili u fshi një ditë më parë, duke zbutur qëndrimin e tij. Pasditen e së enjtes tre eurodeputetët, kryetari i Komisionit për Punë të Jashtme David McAllister, raportuesja për Shqipërinë Isabel Santos dhe kryetari i Delegacionit të Parlamentit për Shqipërinë Manolis Kefalogiannis shpreheshin se cdo ndryshim i marrëveshjes së 5 qershorit (pas nismës për hapjen e listave dhe koalicionet) pa konsensus me të gjitha partitë mund të rrezikojë konferencën e parë ndërqeveritare për negociatat e anëtarësimit.
Mirëpo, tashmë nga një deklaratë në formë ultimatumi se çdo modifikim i marrëveshjes së 5 qershorit pa konsensus mund të rrezikojë integrimin, qëndrimi i tyre merr një formë më të zbutur duke nënvizuar rëndësinë e marrëveshjes dhe konsensusin për integrimin.
ISHTE
“Ne presim që shumica parlamentare të miratojë ndryshimet e nevojshme pa dëmtuar konsensusin e arritur midis Qeverisë dhe Opozitës më 5 qershor. Çdo modifikim i Marrëveshjes pa arritur një konsensus me të gjitha partitë politike, mund të rrezikojë realizimin e Konferencës së Parë për negociatat e anëtarësimit, dhe për rrjedhojë të ngadalësojë procesin e integrimit europian”.
U BË
“Ne presim që shumica parlamentare të miratojë ndryshimet e nevojshme pa dëmtuar konsensusin e arritur midis qeverisë dhe opozitës më 5 qershor. Është e rëndësishme të arrihet një marrëveshje, të ruhet dialogu dhe konsensusi me të gjitha partitë politike, në mënyrë që të mund të thirret konferenca e parë për negociatat e anëtarësimit, dhe për këtë arsye të vazhdojë procesin e integrimit evropian”.
Shqipëria paraqiti kërkesën e anëtarësimit në 2009 dhe iu dha statusi i kandidatit në vitin 2014. Këshilli vendosi të hap negociatat e pranimit me Shqipërinë dhe Maqedoninë e Veriut më 25 mars 2020, pas propozimeve të Komisionit për një metodologji të rishikuar të zgjerimit.
Në qershor të vitit 2020, Komisioni paraqiti projekt kornizat e negociatave që, pasi të jenë finalizuar, do të përdoren për të negociuar pranimet në BE të dy vendeve të Ballkanit. Shtetet Anëtare të BE-së duhet të miratojnë këto dokumente dhe Kryesia e Këshillit do t’i paraqesë ato në fillimin e negociatave të pranimit. Publikimi i raporteve të zgjerimit të Komisionit Evropian për vitin 2020 është shtyrë deri në vjeshtë për shkak të pandemisë COVID-19.
