Një ngjarje e rëndë ka ndodhur mbrëmjen e djeshme në Gjirokastër. Gjergji Hasan Ajmasi 35 vjeç është qëlluar me sende të forta sapo ka dalë nga lokali ku po qëndronte. Ai ka ndërruar jetë rrugës për në Spitalin “Omer Nishani”.
Këtë mëngjes policia ka informuar se është arrestuar i dyshuari kryesor, Pariz Xhihani. Bashkë me autorin, u arrestuan për moskallëzim krimi dhe persona të tjerë, të cilët janë identifikuar si Niko Xhihani, Andon Ahmeti dhe Vasil Mehmeti.
Sipas policisë vdekja e 35 vjeçarit ka ndodhur pas një sherri të momentit.
NJOFTIMI I PLOTË:
Gjirokastër
Zbardhet në kohë rekord ngjarja e ndodhur mbrëmjen e datës 15.07.2020, në lagjen “Zinxhira”, ku humbi jetën 35-vjeçari Gj. A.
Kapet dhe vihet në pranga 23-vjeçari, autori i ngjarjes.
Arrestohet dhe një shtetas tjetër, për moskallëzim krimi, si dhe procedohen në gjendje të lirë dy të tjerë.
Menjëherë pas ngjarjes së ndodhur në lagjen “Zinxhira”, Gjirokastër, ku pas një konflikti të çastit mes dy shtetasve humbi jetën shtetasi Gj. A., 35 vjeç, strukturat e Drejtorisë Vendore të Policisë Gjirokastër organizuan punën për zbardhjen e ngjarjes.
Falë punës së mirorganizuar hetimore u bë e mundur zbardhja e ngjarjes, identifikimi i autorit, kapja dhe shoqërimi i tij në ambientet e Drejtorisë Vendore të Policisë.
Në përfundim të veprimeve të para hetimore të kryera, u bë arrestimi në flagrancë i shtetasit P. Xh., 23 vjeç, banues në lagjen “Zinxhira”, për veprën penale “Vrasja me dashje”, pasi gjatë një konflikti të çastit, për motive të dobëta, ka goditur me sende të forta shtetasin Gj. A., duke i shkaktuar vdekjen.
Gjithashtu u arrestua në flagrancë shtetasi A. A., 18 vjeç, si dhe u proceduan penalisht shtetasit N. Xh., 16 vjeç dhe V. M., 14 vjeç, banues në lagjen “Zinxhira” , për veprën penale “Moskallëzim krimi”, pasi kanë qenë të pranishëm në momentet që ka ndodhur krimi dhe nuk e kanë kallëzuar atë.
Materialet i kaluan Prokurorisë pranë Rrethit Gjyqësor Gjirokastër, për veprime të mëtejshme.
