Janë konfirmuar pozitiv me koronavirus dy punonjës policie në qarkun e Tiranës ndërkohë që 7 të tjerë në kryeqytet janë vetëkarantinuar, nga 17 në total në të gjithë vendin. Të prekurit me Covid -19 janë efektivë të Rendit.
Dyshohet se virusin mund ta kenë marrë gjatë punës së tyre në terren. Ndërkohë që njëri prej të prekurve ndodhet i shtruar në Spitalin Infektiv. Autoritetet shëndetësore u kanë bërë tamponët edhe kolegëve e disa prej familjarëve të tyre, me të cilët efektivët e prekur nga virusi kanë pasur kontakte ditët e fundit.
Deri më tani 7 efektivë janë të vetëkarantinuar në Tiranë, 6 janë të izoluar në banesat e tyre në Elbasan, 3 në Korçë dhe 1 në Berat. Punonjësit e vetëkarantinuar kanë pasur kontakte me kolegë e familjarë të infektuar me herët.
Për të parandaluar përhapjen në masë të Covid-19, në hyrje të Drejtorisë Vendore të Policisë së Tiranës funksionon tuneli dezinfektues. Qytetarët që futen në këtë godinë për të marrë shërbim nuk lejohen pa maskë.
Kujtojmë se në 24 orët e fundit janë regjistruar 2 viktima nga Covid-19: Një 64-vjeçare nga Shkodra dhe një paciente 63-vjeçare nga Elbasani.
Ndërkohë janë kryer 451 testime për të dyshuar të prekur me Covid-19, nga të cilat janë konfirmuar 96 raste pozitive. Shpërndarja gjeografike e rasteve është si vijon: 51 raste në Tiranë, 6 në Shkodër, 5 në Durrës, nga 4 raste në Elbasan, Pogradec, nga 3 raste në Krujë, Kukës, nga 2 raste në Fier, Lezhë, Kavajë, Kamëz, Dibër, dhe nga 1 rast në Kurbin, Korçë, Devoll, Has, Lushnje, Mat, Përmet, Sarandë, Prrenjas, Bulqizë.Aktualisht janë të shtruar 90 pacientë në spital, 10 pacientë janë në terapi intensive dhe 5 prej tyre janë të intubuar në gjendje të rëndë.
