Ministrja e Shëndetësisë , Ogerta Manastirliu, zhvilloi ditën e sotme një vizitë në spitalin “Shefqet Ndroqi” në Tiranë dhe ku dhe njoftoi se kanë nisur përgatitjet për ta kthyer atë në spital COVID2.
Me anë të një video-je të publikuar në Facebook ministrja shprehet se do të forcohen kapacitetet spitalore dhe në terapinë intensive për të përballuar numrin në rritje të të prekurve.
“Pas diskutimeve me Komitetin e Ekspertëve në Ministrinë e Shëndetësisë kemi vendosur që së shpejti, brenda pak ditësh, do të rihapim si spital COVID2, Spitalin ‘Shefqet Ndroqi’. Kemi zgjedhur të ndjekim këtë skenar, pra rihapjen e “Shefqet Ndroqnit” si spital COVID2 për disa arsye. Për arsye të kapacitetetve, të infrakstukturës të dedikuar që ky spital ka, të ekipit të specializuar që ky spital ofron dhe eksperiencës dhe ekspertizës që ka fituar edhe përgjatë fazës së parë, kur ky spital ishte i dedikuar për trajtimin e pacientëve me COVID”, tha Manastriliu.
Duke vlerësuar punën e specializuar të spitalit “Shefqet Ndroqi”, Manastirliu tha se shërbimet dhe pacientët e këtij spitali, së bashku me një pjesë të stafit do të zhvendosen në një pavion të dedikuar tek ish-Kirurgjitë në QSUT.
“Jemi duke u organizuar për të gjitha hapat që nevojiten, në mënyrë që shërbimi për pacientët që vuajnë nga sëmundje të mushkërive të mos mungojë. Ata do të trajtohen në QSUT, ku ka një kapacitet të dedikuar me një numër shtretërish të përcaktuar në ish-spitalin e kirurgjisë, për sëmundjet pneumologjike”, – tha Manastriliu.
Ajo tha se stafet mjekësore janë në gatishmëri ndërkohë që u bëri thirrje qytetarëve që të mbajnë distancën, maskat dhe të ruajnë higjienën personale dhe kolektive.
https://www.facebook.com/OgertaManastirliu/videos/291025262114825/?vh=e&d=n
Njoftimi i plotë
🔴#COVID19
Në spitalin Universitar “Shefqet Ndroqi”, ku kanë nisur përgatitjet për t’u kthyer në spital COVID2, nisur nga fluksi i shtuar i pacientëve të prekur nga COVID19.
✅ Po forcojmë kapacitetet spitalore edhe në terapinë intensive, për të përballuar numrin në rritje të të prekurve. Stafet mjekësore janë në gatishmëri por një thirrje për çdo qytetar për respektimin e rregullave:
1️⃣ Mbani distancën
2️⃣ Vendoseni maskën
3️⃣ Ruani higjienën personale dhe kolektive
#BASHKË kundër #COVID19
