Ministrja e Shëndetësisë Ogerta Manastirliu e ftuar në studion e “AbcNews”tregoi se çfarë pune po bëhet me përgatitjet për vjeshtën kur bashkë me Covid-19 pritet që të jenë edhe viruset e stinës.
Manastirliu u shpreh se, brenda buxhetit në dispozicion, po punohet me fuqizimin në pajisje dhe autoambulanca për spitalet rajonale si dhe Urgjencën Kombëtare.
“Ajo që dihet me siguri është se ky virus është i paparashikueshëm..Ne jemi duke punuar fort për kapacitete ne spitalet rajonale. Do duhet që rastet që janë me sëmundje të tjera të trajtohen aty, vijon fuqizimi i tyre dhe fuqizimi me pajisje. Brenda gjithë buxhetit. Duam të fuqizojmë urgjencën kombëtare me autoambulanca të reja që të kemi një administrim më efikas në terren dhe për të përmirësuar flotën e aparaturave,” shpjegoi ministrja.
Teksa u pyet për testimin masiv, ministrja tha se nuk ka sens t’u bëhet të gjithëve tampon pasi kjo do të ulte vigjilencën e mjekëve.
“Ka disa teori, po i shqyrtojmë të gjitha mundësitë, kur bëjnë sens dhe kur nuk riskojnë pjesën tjetër të shërbimit. Sepse mund të jetë lehtësuese bërja e tamponit, për të gjithëve që vijnë në spital, por kjo mund të ulte vigjilencën e stafeve mjekësore. Po çfarë bëjmë ne? Në rastet kur ka një pacient të caktuar të rastit të dyshuar, vendoset direkt për tampon dhe izolim,”– u shpreh Manastirliu.
Kujtojmë se aktualisht janë të shtruar në spitalin Infektiv 84 pacientë, ku 11 pacientë janë në terapi intensive në gjendje serioze dhe 6 prej tyre janë të intubuar, në gjendje të rënde.
Gjatë 24 orëve të fundit janë kryer 401 testime për të dyshuar të prekur me COVID19, nga të cilat janë konfirmuar 82 raste pozitive.
Shpërndarja gjeografike e rasteve është si vijon: 30 raste në Tiranë, 11 në Shkodër, 6 në Kukës, 5 në Elbasan, nga 4 raste në Bulqizë, Krujë, Berat, Malësi e Madhe, nga 3 raste Kavajë, Përmet, 2 në Korçë, nga 1 rast në Pukë, Mirditë, Kamëz, Gjirokastër, Tepelenë, Dibër.