Lideri i opozitës Lulzim Basha ka reaguar me një mesazh ngushëllimi në Twitter për ndarjen nga jeta të Dr. Hysni Shkjau, i cili humbi sot betejën me koronavirusin Covid-19.
Basha vlerëson kontributin 40-vjeçar të mjekut në fushën e mjekësisë si dhe shpreh ngushëllimet për familjen dhe njerëzit e tij të afërt.
“Ndarja nga jeta e Dr. Hysni Shkjaut është një dhimbje e madhe për familjen dhe miqtë e tij dhe një humbje e pazëvendësueshme për qytetarët e Pukës të cilëve ai u shërbeu me përkushtim për 40 vite.E sotmja është një ditë zie për personelin shëndetësor në vend, që mes përballjes të vështirë me pasojat e COVID-19, humbi sot dhe një mjek që jetën dhe profesionin e vuri në mbrojtje të qytetarëve.Ngushëllimet e mia shkojnë sot për familjen e Dr. Hysni Shkjaut, mjekut të madh të Pukës që do ta nderojë dhe kujtojë përherë veprën e tij. U prehtë në paqe, “ shkruan Basha.
Kujtojmë se sot ndërroi jetë mjeku i dytë në vendin tonë nga Covid-19. Pas Arjan Pushit, Ministria e Shëndetësisë informoi se ka ndërruar jetë edhe mjeku Hysni Shkjau, 69 vjeç.
Në njoftimin e Ministrisë thuhet se mjeku nuk e kishte ndërprerë punën dhe vijonte të shërbente si mjek familje në qendrën shëndetësore Qafë-Mali në Bashkinë Fushë-Arrëz të Pukës. Ai luftonte prej disa ditësh me Covid-19 në spitalin Infektiv dhe gjendja e tij u rëndua si pasojë e vështirësisë në frymëmarrje dhe disa sëmundjeve bashkëshoqëruese.