Xhaxhai i Blerta Josifit, njërës prej vajzave të mbijetuara në Kombinat ka treguar në dëshminë e tij se 34-vjeçarja nuk ka ku të qëndrojë pasi të dalë nga spitali.
Dhimitraq Josifi kërkoi ndihmë publike në një lidhje direkte me emisionin “Me zemër të hapur” në News 24, për të ndërruar shtëpinë e vajzës, pasi Blerta nuk pranon më që të hyjë tek apartamenti ku vdiqën e motra dhe e ëma.
Ai tha se ajo ka nevojë për një ose dy infermiere të koka pasi nuk ushqehet dot vetë. Blerta duhet të hajë disa herë në ditë dhe të ketë asistencë pasi nga pafuqia as lugën nuk ngre dot. Për xhaxhain e vajzës, fajtore për indoktrinimin fetar është nëna e tyre, Zhaneta. Vajza e ka botëkuptimin e vështirë dhe madje as nuk flet për personat me kostum që i shkonin në shtëpi, shprehet xhaxhai.
PJESË NGA DËSHMIA E DHIMO JOSIFIT:
Nuk dua të ndërhyj në hetime me dëshminë time. Në këtë rrugë vajzat i ka futur nëna e tyre. Blerta tani është mirë nga ana mendore. Por më mirë të mos e parë atë natë. Folëm me Blertën dhe bëmë biseda të kujdesshme. Edhe vëllai donte të shqyente derën. Po unë e tërhoqa se mendova që të na denonconim. Kur e mora vesh…çfarë të tregoj. Po ta dinim që do ndodhte një gjë e tillë, jo derën po pallatin do shembnin. Na premtuan se me 28 do dilnin, për Krishtlindje. Kishim frikë për Anisën se mendonim mos kishte ikur jashtë, mos e kishin marrë këta të fesë, s’na e merrte mendja. Unë nuk i kam marrë inat kurrë. Për Blertën, nuk është puna për një copë bukë se aq ia jap vetë unë. Por ta ndihmojmë që të jetojë. Ashtu si mund të jetë. Që sot që e kam në spital, kërkoj ndihmë. Të na ndërrohen gratë në spital. Gratë i kemi ta pastra, nga korona apo këto…Blerta nuk ha dot vetë, nuk pi dot vetë. Kërkon të hajë çdo 10 minuta. Do dy infermiere tek koka. Çfarë nuk i vjen ndërmend asaj. Nga ana mendore është në rregull Blerta. Por është e dobët fizikisht, se nuk ngre dot dorën të fusë lugën në gojë. Natën e ka problem dritën, se është mësuar në errësirë. Shikon ëndrra dhe ulërin në gjumë. Po nuk pati njëri tek koka…Rrimë natë e ditë tek koka. Vajza ka një shtëpi, por nuk futet më aty se ma ka bërë be mua. Këtë shtëpinë do t’ua japim, dhe të na japin një shtëpi tjetër. Edhe më e vogël po qe. Të ma sjellin afër mua. Do shkojmë me radhë tek ajo. Se nuk e lëmë dot vetëm. E ka botëkuptimin e vështirë. E kam provokuar edhe vetë. Nuk ka folur fare për personat me kostum që i shkonin në shtëpi. Nuk ka ndërmend të flasë. Nuk kam parë gjë as unë.
Ngjarja e rëndë u zbulua mbrëmjen e 2 korrikut dhe tronditi opinionin publik. Në pallatin parafabrikat mbrapa ish-Mapos rruga “Hamdi Cenoimeri”, dy trupat e vdekur të dy grave kanë “bashkëjetuar” për ditë me radhë me banorët e lagjes. Zhaneta Josifi, 56 vjeçe dhe Anisa Josifi 30 vjeçe, u gjetën të vdekura në banesë, ndërsa në gjendje të rëndë ishte edhe vajza tjetër e Zhanetës, Blerta Josifi 34-vjeçe. Kjo e fundit bashkë me nënën e saj kishin mbajtur në banesë trupin e pajetë të Anisës, të cilin e lyenin me vaj e uthur që të mos binte erë.
Në banesën e tyre të thjeshtë në këtë lagje të Tiranës, policia gjeti shënime fetare, ku u mësua se nëna dhe dy vajzat kanë qenë praktikante të sektit të njohur si “Dëshmitarët e Jehovait”. Blerta ndodhet e shtruar në spitalin Psikiatrik të Tiranës.
