Festa e Pavarësisë së SHBA-së ka bërë bashkë krerët më të lartë të shtetit shqiptar, në një mbrëmje në ambasadën amerikane në Tiranë.
Në fotot e publikuara nga ambasadorja Yuri Kim, shihet se në ceremoni ka qenë kryeministri Edi Rama, kreu i bashkisë Tiranë Erion Veliaj, Presidenti Ilir Meta, Kreu i Kuvendit Gramoz Ruçi dhe kryedemokrati Lulzim Basha.
Në këtë takim nuk mund të mungonte ambasadori i BE në Shqipëri, Luigi Soreca, i cili ka qenë krah politikanëve shqiptarë.
Kjo është ndër të rrallat herë në vitet e fundit që këta personalitete të politikës shqiptare bëhen të gjithë bashkë, dhe kjo është meritë e ambasadores Kim.
Ajo që bie në sy te të pranishmit, është numri i ulët i të ftuarve, për shkak dhe të pandemisë së shkaktuar nga Covid 19. Ashtu siç shkruan edhe vetë ambasadorja Kim, vitin tjetër shpresojmë që Pavarësia e SHBA-ve të festohet me më shumë miq dhe dashamirës shqiptarë.
“E nderuar të festoj 244 vjetorin e tonë me Ilir Metën, Edi Ramën, Gramoz Ruçi, Erion Veliaj, Lulzim Bashën. Faleminmderit të gjithëve miqve shqiptarë për urimet. Shohim përpara për festime më të mëdha vitin tjetër”, shkruan ambasadorja Kim në Twitter.
