Kreshnik Tusha u arrestua menjëherë pas atentatit të ndodhur në 31 maj në Laç, pas vrasjes së Bujar Likës dhe Paulin Gjergjit.
21-vjeçari Tusha shkoi në spital i plagosur dhe policia e arrestoi me akuzën e vrasjes, pasi u dyshua si personi që ishte plagosur brenda hotelit.
Kreshnik Tusha i tha policisë se e qëlluan kur doli në rrugë, por versioni i tij nuk u besua.
Me arrestimin e Eduart Lamaj ose i njohur ndryshe si Leandro Simoni, të tjera detaje janë zbardhur lidhur me ngjarjen e rëndë.
Shenjat e gjakut, të personit të plagosur gjatë përplasjes me armë i përkasin Lamajt sipas prokurorisë, ndaj versioni i Kreshnik Tushës është vërtetuar sipas prokurorisë.
Tusha ka dalë në hyrje të shtëpisë së tij në momentin që ka dëgjuar krismat e armëve për të parë se çfarë ka ndodhur, pasi e kishte banesën shumë pranë hotelit ku u ekzekutuan biznesmenët.
Ky ka qenë edhe momenti kur autorët e atentatit kanë menduar se një person tjetër i panjohur prej tyre, u ka dalë në pritë, dhe kanë qëlluar në drejtim të tij duke e lënë të plagosur.
Kreshnik Tusha pritet të lirohet nesër nga të gjitha akuzat.
