Burime për “ABC News” bëjnë të ditur se udhëzimi që do t’i kërkojë anëtarësisë së Partisë Demokratike të zgjedhë përmes parimit një anëtar një votë deputetët e saj për parlamentin e ardhshëm është gati, dhe po konsultohet me forca partnere që zhvillojnë këtë proces në vendet e tyre.
Por pavarësisht se ia ka lënë anëtarësisë përgjegjësinë e propozimeve dhe vendimmarrjes, javët e fundit në takimet që ka zhvilluar me qytetarë, biznese dhe fermerë, vetë kreu i demokratëve ka qenë i shoqëruar nga disa prej ish-deputetëve të tij që pritet t’i nënshtrohen testit të anëtarësisë në muajt në vazhdim.
Në takimet e zhvilluara në Tiranë, Basha është shfaqur në krah të ish-deputetëve, Halim Kosova, Jorida Tabaku, Gert Bogdani, Grida Duma, Klevis Balliu.
Në Vlorë kryedemokrati u shfaq në krah të ish-kandidatit për kryetar Bashkie, Genc Deromemaj.
Në Elbasan në krah të ish-deputetëve Luçiano Boçi dhe Endri Hasa.
Ndërkohë që takimet në rrethe do të vijojnë edhe në ditët e ardhshme.
Procesi i përzgjedhjes së kandidaturave pritet të nisë javën e ardhshme dhe do të zgjasë deri në 15 shtator.
“Sistemi ynë synon t’i japë mundësi anëtarëve të PD, demokratëve që të zgjedhin ata, se kë duan që t’i përfaqësojë, qoftë në parlamentin e ardhshëm, qoftë në pushtetin lokal. Kjo për mua është zgjidhja e vetme, për problemin që është krijuar me listat e hapura”, u shpreh Paloka.
Pro listave të hapura është shprehur edhe Grida Duma, ish-deputetja e Partisë Demokratike.Listat e hapura sipas saj, duhet të jetë hapi rradhës që duhet diskutuar, por që më parë duhet të garantohet vota e lirë.
Por edhe në listat e hapura, kryetarët janë ata që rekomandojnë. Le të shkojnë dhe të votojnë shqiptarët për Grida Dumën, apo këdo që ia shohin emrin, ne duhet t’i vendosim në pozita konkurrenciale. Nuk jam e vetmja që kam folur për këtë formulë konkurrencialiteti, por qëndroj në kollonën që kjo nis nga vota e lirë. Listat e hapura duhet të jenë hapi i radhës që duhet diskutuar. Qëndroj plotësisht në linjën e ngulmimit të luftës që ne duhet të sigurojmë votën e lirë,” u shpreh Grida Duma.
