Ditën e sotme, kryeministri Edi Rama deklaroi në mbledhjen e Këshillit Europian të Integrimit se për të dhe për qeverinë e tij, kjo do të jetë hera e fundit, kur në çështje të politikave të brendshme do të duhet ndërhyrja e ambasadave, për t’u arritur dialog mes palëve politike.
Rama pranoi ndasitë që ka me presidentin Ilir Meta, por takimi mes palëve tha ai mund të zhvillohet kudo ku palët janë dakord, por kurrsesi nëpër dyer ambasadash.
“Nuk është sekret që me presidentin kemi çështje të hapura, por sigurisht që mund të takoheshim dhe të takohemi, edhe tek presidenti, edhe tek kryetari i Kuvendit, edhe tek Baba Mondi, edhe tek Kryegjyshata, edhe tek Katolikët.
Kjo është marrëveshja e fundit që bëjmë nëpër ambasada, kjo është hera e fundit nga ana ime.
Ua kam thënë edhe ambasadorëve, për çështjet tona s’mund të bëjmë ndryshe për punët tona.
Në këtë Këshill duhet të ishte patjetër edhe opozita, e sotmja dhe e nesërmja.
S’kemi në Shqipëri asnjë forcë politike, shoqërore, që të predikojë aleanca alternative me aleancën strategjike të SHBA dhe BE. Që të predikojë qasje që shkojnë në konflikt me këtë.
Gjithë ky qëllim i madh dhe i ndarë, e bën akoma dhe më problematik faktin se jemi ende të paaftë që të komunikojmë shqip me njëri-tjetrin, pa përkthyes.
Rasti i fundit i freskët, që u përshëndet këtu, është flagrant. Jemi mbledhur në një ambasadë të gjithë përfaqësuesit e forcave më të mëdha politike të vendit, mbyllur atje.
Me ditë me netë, për të lënë gjerat siç janë. Për t’u marrë vesh më në fund që ‘nuk do të bëjmë atë që duhet të binim, por t’i lëmë gjerat si janë’.
Po kur sheh këtë përfundim, njeriu mendon natyrshëm se a nuk do të ishte mirë që të bënim vet këtë?! Nuk do ishte mirë që mos të kërkonim strehë në një ambasadë mike.
Pse komunikimi mes nesh, të kalonte në disa gjuhë?! Mendoj se kjo do të jetë e fundit”, është shprehur kryeministri Rama.
