Akuza të forta janë drejtuar nga presidenti i Kosovës, Hashim Thaçi, ndaj kryeministrit në detyrë Albin Kurti.
Kreu i shtetit të Kosovës ka reaguar pas vendimit të qeverisë për vendosjen e tarifës prej 22 eurosh për ata që futen nga Shqipëria.
Në një reagim në mediat sociale, Thaçi shkruan se Kurti hapi kufirin me Serbinë sikur ta kishte bahçen e babait, duke i hoqi asaj taksën, por i vuri taksë Shqipërisë.
Më tej, ai e quan vendimin absurditet dhe për të ky nuk është produkt për bashkim kombëtar.
“Albin Kurti derisa ka hapur krahë më krah kufirin me Serbinë, për të hyrë kushdo, pa asnjë procedurë si në bahçe të babës, ai nga zyra e uzurpuar sot ka urdhëruar dhe keqpërdorur Policinë e Kosovës. Ai padrejtësisht dhe kundërligjshëm sot ka urdhëruar policinë që të gjithë qytetarët e Shqipërisë që hyjnë në territorin e Kosovës, përpos vonesave procedurale, të dërgohen shtatë ditë në karantinë për të pritur testimin për COVID-19. Po ashtu, me veprime shtesë, ai ka urdhëruar që automjetet transportuese që hyjnë nga territori i Shqipërisë në emër të dezinfektimit të ngarkohen me taksë të veçantë, duke rënduar edhe më shumë lëvizjen e lirë dhe qarkullimin e mallrave. Ky është absurditet! Hapet me Serbinë dhe e mbyllë Kosovën nga Shqipëria. I heq taksën Serbisë dhe ia vë Shqipërisë. Ky është predikuesi i bashkimit kombëtar! Në fakt, këto veprime janë shqelmat e fundit të Kurtit nga zyra e uzurpuar!”, shkruan Thaçi.
Ditën e sotme janë ndaluar dhjetëra kamionë që kanë tentuar të transportojnë mallra dhe produkte u është vendosur një taksë prej 22 eurosh nga pala pritëse.
Kalimi u është ndaluar edhe shtetasve të tjerë, të cilëve u është kërkuar një certifikatë nëse e kanë kryer testin për koronavirusin, ose në të kundërt duhet t’u nënshtrohen karantinimit njëjavor në Kosovë.
Rama e quajti vendimin e çuditshëm dhe pak çaste më pas, Kurti ka vendosur pezullimin e vendimit.
Lajmi është njoftuar nga Ministria e Brendshme e Kosovës, që bën me dije se importuesit, ngadoqoftë që vijnë, nuk kanë pse të dezinfektojnë maunet kundrejt pagesës 22 euroshe.
