Kryeministri Edi Rama realizoi mbrëmjen e sotme atë që ai e ka quajtur komunikimin e fundit kushtuar ekskluzivisht luftës me Covid-19, ku njoftoi qytetarët lidhur me heqjen e masave.
Gjatë fjalës së tij, kreu i qeverisë njoftoi se kjo do të jetë java e fundit e kufizimeve me përjashtim të aktiviteteve sportive, dasmave dhe funeraleve, kurse transporti publik do të rrijë mbyllur edhe për pak.
Mirëpo, duket se komunikimi i fundit, pas 3 muajsh në Facebook, e ka bërë pak nostalgjik kryeministrin Rama.
Ai tha se ende nuk është mbledhur me qeverinë për të bërë bilancin e punës për këto muaj, por nëse do të kthehej pas në kohë nuk do i përgjigjej më komentuesve fyes dhe brutal të faqes së tij në Facebook.
Ai tha se ka marrë shumë akuza lidhur me komunikimet e tij në Facebook, por shtoi se në llogarinë e tij nuk ka asnjë informacion që nuk është i nevojshëm për epideminë.
Po ashtu, ai u shpreh se nuk është politikani profesionist me dy fytyra, një kur kamerat janë të hapura dhe një për kur kamerat janë të mbyllura.
“Në këtë rast nuk e kam ende të plotë analizën e plotë vetes dhe punës time dhe nuk e kemi bërë me skuadrën e qeverisë. Nëse do të kthehesha mbrapsht nuk do i përgjigjesha më komentuesve fyes dhe brutal të faqes në Facebook. Unë nuk mund ta bëj këtë punë pa luftë, pa gjak pa pasion, i mbroj të vërtetat e mia pa rezerva, mënyra se si e bëj mund të duket arrogancë por e vërteta është se nuk vjedh, nuk vras, nuk zgjohem pas të tjerëve, unë jetoj për të punuar. As kam lindur në kallëpin e politikanit dhe as nuk dua të vdes aty. Nuk jam politikani profesionist që kur ndizen kamerat kanë fytyrë tjetër dhe kur fiken një tjetër. Duke e vënë re se shumëkujt përgjigjet që jap për çështje të ndryshme u duken ironi dhe arrogancë ndjehem me faj pavarësisht se jam nisur nga qëllimi i mirë për të sqaruar pozicionin tim, i kërkoj ndjesë të gjithë atyre që pa dashje i kam bërë atyre që i është dukur si fyerje.”