Për më shumë se tre muaj vendi ynë është nën masa të rrepta sigurie për shkak të pandemisë Covid-19.
Mjekët bëjnë thirrje të përditshme në media për distancim social dhe për t’u mbrojtur me maska e doreza kur ndodhen në ambiente të hapura që frekuentohen nga shumë njerëz.
Edhe baret e kafenetë, nuk kanë më shumë se dhjetë ditë që kanë rinisur aktivitetin e tyre, po ashtu në masa sigurie, duke ruajtur distancën.
Ditën e sotme, përgjegjësja e Departamentit të Epidemiologjisë në ISHP, Silva Bino, ka raportuar një situatë shqetësuese sa i përket respektimit të rregullave të distancimit social.
Bino ka shkuar të marrë një letër për makinën por siç vihet re edhe nga fotoja e publikuar prej saj qytetarët janë në rradhë në grumbull, pa respektuar aspak distancimin social.
“Me marrë një letër të makinës që në pikë të mëngjesit. Rregullat e distancimit siç e shifni”, shkruan Bino e shqetësuar krahas fotos që ka publikuar.
