Pak minuta para nisjes së protestës mbarëkombëtare të thirrur nga Aleanca për Mbrojtjen e Teatrit dhe e mbështetur nga opozita, presidenti Ilir Meta mbajti një takim me ambasadorë të BE në vendin tonë.
Së fundmi, janë zbardhur detaje nga takimi qe Presidenti i Republikës,Ilir Meta zhvilloi sot me 4 ambasadorët e vendeve të grupit të Vishegradit, të akredituar në Tiranë.
Presidenca njofton se Meta dhe ambasadorët e Çekisë, Polonisë, Hungarisë dhe Sllovakisë vlerësuan marrëdhëniet politike dhe bashkëpunimin miqësor dypalësh, si dhe shkëmbyen mendime rreth forcimit të mëtejshëm të bashkëpunimit edhe ndërmjet rajoneve V4-Ballkani Perëndimor.
Gjatë takimit u ndanë informacione për situatën e pandemisë Covid-19 në secilin vend, duke theksuar nevojën për një hapje graduale dhe të kujdesshme e kufijve, si dhe lehtësimin e masave shtrënguese që do t’i jepnin frymëmarrje dhe impuls ekonomisë në përgjithësi, por edhe vijimit të trendit pozitiv të viteve të fundit të fluksit të turistëve nga këto vende drejt Shqipërisë.
Po ashtu, bëhet me dije se presidenti Meta i njohu ambasadorët edhe me zhvillimet më të fundit politike në vend, duke shprehur shqetësimin se provokimet dhe acarimi i klimës politike nuk i shërbejnë avancimit të përspektivës europiane të vendit.
Sakaq, Ambasada Amerikane në Tiranë ka reaguar në lidhje me protestën që po zhvillohet para Ministrisë së Brendshme.
Megjithëse nuk ka dhënë asnjë qëndrim zyrtar në lidhje me shembjen e Teatrit Kombëtar, ambasada iu bën thirrje qytetarëve amerikanë në Shqipëri të shmangin daljen.
“Sot në afërsi të Ministrisë së Brendshme në Tiranë, thuajse në qendër të qytetit mbahet një protestë. Kjo protestë pritet që të nisë në orën 16.30 minuta dhe nuk dihet sesa zgjat. Qytetarët amerikanë që jetojnë në Shqipëri duhet të kenë kujdes dhe të shmangin daljen në këto zona: Shmangni vendet e mundshme të protestës, përfshirë Bulevardin Kombëtar Shmangni çdo tubim publik të njerëzve. Monitoroni median lokale për të qenë në dijeni të asaj që ndodh Jini të vetëdijshëm për rrethanat tuaja Mbani një profil të ulët”, njofton ambasada.
