Një lajm aspak i mirë raportohet në Kosovë.
Mësohet se 5 mjekë dhe 14 infermierë janë vetëizoluar në banesat e tyre pasi patën kontakte me një paciente të infektuar me koronavirus.
Ky lajm është dhenë nga Ministria e Shëndetësisë në Kosovë me anë të një njoftimi në faqen e saj zyrtare.
Në njoftim thuhet se edhe dy higjienistë dhe dy bartës, janë futur në vetëizolim, sipas rekomandimeve të IKSHPK-së. Pritet që atyre t’u bëhen testet për koronavirus.
Njoftimi i plotë:
Një paciente e shtruar në Mjekimin Intensiv të QKUK-së ka rezultuar ditën e diele pozitiv në SARS-COV-2.
Me qëllim të parandalimit të përhapjes së infeksionit, ndërrimi i ditës së diele i Klinikës së Anesteziologjisë dhe ndërrimi i ditës së shtune, i kësaj klinike: 5 mjekë, 14 infermierë, 2 higjienistë dhe 2 bartës, janë futur në vetizolim, sipas rekomandimeve të IKSHPK-së.
Të njëjtëve, do t’u bëhen testet gjatë javës për SARS-COV-2, derisa pacientja, të dielën është shtruar për Mjekim në Klinikën Infektive.
Shërbimi mjekësor në Klinikën e Mjekimit Intensiv, vazhdon , pasi që menaxhmenti aty ka riorganizuar ekipet e tjera me qëllim që shërbimi të mos mbetet pa personelin e nevojshëm për ofrim të shërbimeve mjekësore për pacientët.
