Guvernatori i Bankës së Shqipërisë, Gent Sejko ka dalë në një konferencë para mediave pak minuta më parë.
Ai ka folur për krizën ekonomike me të cilën po përballen bizneset shqiptare për shkak të situatës nga pandemia.
Sipas guvernatorit, 20 mijë biznese kanë shtyrë kreditë e tyre si pasojë e krizës me të cilën po përballen për më shumë së dy muaj.
Për shkak të kësaj situate, Banka e Shqipërisë do aplikojë lehtësira të përkohshme operacionale, pasi dhe ai vetë ka kërkuar lehtësime të barrës fiskale.
Sejko më tej ka shtuar se duhet të kemi reagim largpamës, pasi na presin sfida ekonomike.
Gjithashtu, Sejko ka folur edhe për garancinë sociale. Deri tani janë dhënë 1 miliardë lekë kredi për të paguar punonjësit e tyre dhe se ende nuk ka përfunduar.
“Garancia sovrane për biznesin akoma nuk është përfunduar, normalisht do të shikojmë efektin kur të prezantohet, për momentin bankat po operojnë me garancinë e parë sovrane për pagat e punonjësve.
Kemi rreth 70 raste të aprovuara, 8.5 mln euro, por ka edhe 300 aplikime të tjera në proces. Është një garanci po elaborohet në sistemin bankar.
E dyta do të shikohet kur të bëhet e vlefshme, edhe ne më pas do të kemi një ide më të qartë”, është shprehur më tej guvernatori i BSH.
“Ekonomia shqiptare pritet të pësojë një rënie të fortë të aktivitetit ekonomik gjatë vitit 2020, në përmasa të cilat nuk i kemi përjetuar gjatë dy dekadave të fundit.
Ajo do të shoqërohet me rritje të papunësisë, rënie të të ardhurave dhe vështirësi financiare për bizneset e familjet.
Në planin mikroekonomik, rënia e të ardhurave, pakësimi i likuiditetit dhe përkeqësimi i aftësisë paguese, do të testojnë qëndrueshmërinë financiare të bizneseve.
Në planin makroekonomik, rritja e borxhit privat dhe publik do të testojë qëndrueshmërinë e ekuilibrave ekonomikë të vendit.
Së fundi, goditja që ka pësuar sektori real nuk do të kalojë pa lënë gjurmë as në tregun financiar dhe as në treguesit e aktivitetit të sektorit bankar.
Përmasat dhe kompleksiteti i krizës kërkojnë një përgjigje koherente dhe gjithëpërfshirëse, tha guvernatori.
