Prej ditësh qeveria shqiptare ka ndërmarrë një sërë masash lehtësuese, të vendosura pas goditjes së vendit nga koronavirusi, teksa ditën e sotme kurba arriti në nivelin me të ulët prej 9 marsit, pasi Ministria e Shëndetësisë njoftoi se në 24 orët e fundit janë regjistruar vetëm 4 raste të reja.
Mirëpo, sipas mjeku Tritan Kalo shifrat e ulëta të rasteve të reja nuk duhet të na ulin vigjilencën dhe duhet të respektohen masat.
Në një lidhje me Skype për ‘Open’ Kalo u shpreh se shifrat janë shumë optimiste, por duhet që të respektohen masat kundër Covid-19 dhe të respektohet distancimi social.
“Shifra 4 përkon me numrin 4 të rasteve të para. Me të infektuarit e parë në mars. Por shifra e ulur nuk duhet të na shtyj drejt një optimizmi të rremë, por duhet të na bëjë më vigjilentë. Nëse respektojmë distancimin fizik, të mos neglizohohet higjena dhe hapja të jetë e kujdesshme bashkë me sjelljen tonë, kjo do na shtyjë drejt optimizmit real. Ditët në vijim me hapjen që po ndodh, me liberalizimin e masave do të fitojmë një pamje reale të asaj çfarë ndodh në popullatë. Kujdesi ndaj vetes, ndaj distancimit fizik, ndaj higjenës e rikthimi në punë duke zbatuar masat, shpresojmë mos të kemi përplasje me këtë infeksion”, shtoi mjeku Tritan Kalo.
Po ashtu, infeksionisti ka folur edhe rreth debatit më të përfolur në vendin tonë gjatë epidemisë, nëse virusi mund të ketë qenë i pranishëm që në janar në Shqipëri.
Sipas infeksionistit, Covid-19 nuk ka qenë i pranishëm që në janar të këtij viti, apo në dhjetor sepse në këtë periudhë kur dyshohet të ketë hyrë virusi, në Shqipëri ka qenë sezoni i gripi dhe numri i të prekurve s’ka qenë shumë i lartë.
“Pikë së pari, gjatë kësaj periudhe u shfaq grip, por nëse e krahasojmë me vitin e shkuar, numri i të infektuarve nuk u shtua më shumë. Gjithashtu po të shikojmë, nuk kemi një rritje të numrit të të vdekurve. Për më tepër që edhe në spitale nuk pati një fluks pacientësh. Por ajo që ka më shumë rëndësi, përveçse virusi ka qenë në shkurt apo mars është që, u menaxhua mirë situata, kjo duke parë edhe paktin që pati te fqinjët tanë”, tha Kalo.
