Ditën e sotme është mbledhur online Këshilli Politik i Reformës Zgjedhore, ku të pranishëm në mbledhje ishin Damian Gjiknuri, Rudina Hajdari nga opozita e re, Oerd Bylykbashi nga PD-ja dhe Petrit Vasili nga LSI-ja.
Pas mbledhjes, Opozita ka kërkuar që takimi i radhës të bëhet përballë dhe që të mbarojë i gjithë procesi më 31 maj, duke paraqitur edhe 3 kërkesa.
3 kërkesat e opozitës:
1. Reforma të mos vonohet më tej, por të mbarojë deri në 31 maj.
2. Në këtë funksion, takimet mes palëve duhet të rikthehen në formatin e tryezës ballë për ballë, jo përmes komunikimit online.
3. Puna e Këshillit Politik të rinisë me çështjet e propozuara nga opozita, në mënyrë që pala tjetër të mbajë një qendrim për të gjitha propozimet e lëna pa përgjigje deri tani.
Pas këtij takimi, ka ardhur edhe reagimi nga prezenca e OSBE në Shqipëri, që në një postim në mediat sociale, OSBE shkruan se mirëpret dakordësimin e partive për të mbyllur punën e Këshillit Politik brenda datës 31 maj.
“Mbledhja e sotme e Këshillit Politik shënoi një hap tjetër para në procesin e reformës zgjedhore. Mirëpresim dakordësinë e partive për ta përmbushur reformën në këtë forum brenda 31 majit dhe përsëritim gatishmërinë për të vijuar ta mbështetim këtë proces, bashkë me OSBE/ODIHR-it”, shkruhet në njoftim.
Kujtojmë se më 6 maj Komisioni i Reformës Zgjedhore zhvilloi një tjetër mbledhje online, në të cilën u bë informimi i anëtarëve të këtij Komisioni mbi ecurinë e Reformës.
