3 shqiptarë kanë rënë në prangat e policisë britanike, pasi kjo e fundit ka zbuluar një fermë të madhe droge, e cila kapte vlerën e 825 mijë paundëve.
Sipas mediave të huaja bëhet fjalë për 2,000 bimë dhe 3 shqiptarë kujdeseshin për rritjen e tyre.
Mësohet se të arrestuarit janë, Fatlum Alija, 27 vjeç, Fatbardh Selimi, 42 vjeç dhe Agim Isufi, 19 vjeç, të gjithë klandestinë, të futur në mënyrë ilegale në Britani dhe rruga e vetme për të paguar transportin sipas tyre ishte mbjellja e kanabisit.
“Sikur të mos realizohej ky operacion, sasi të mëdha do të kishin përfunduar në rrugët e veri-lindjes së Anglisë. Për pasojë, shumë njerëz do të ishin përfshirë në krim qoftë duke e konsumuar qoftë duke financuar blerjen”.- tha një gjykatës i cili kishte në dorë çështjen e tre shqiptarëve.
Mësohet se operacioni u zhvillua më 20 shkurt, ku Alija dhe Selimi u burgosën për dy vjet dhe Isufi për 20 muaj.
Disa ditë më parë, Ministria e Drejtësisë së Britanisë së Madhe ka publikuar statistikat për numrin e të burgosurve nga ku rezulton se shqiptarët janë nacionaliteti i parë me më shumë të burgosur krahasuar me nacionalitetet e huaja.
Referuar të dhënave të raportit, numri i shqiptarëve në burgjet britanike është rritur 4-fish në raport me vitin 2013, duke përbërë një të dhjetën e personave me shtetësi të huaj në Angli dhe Uells.
Pjesa më e madhe e shqiptarëve vuajnë dënimin për trafik droge, kryesisht të kokainës, megjithatë, vitet e fundit është shtuar shumë edhe numri i atyre që burgosen për trafik kanabisi në shtëpi.
LEXO: Burgjet angleze ‘mbipopullohen’ nga shqiptarët, ja krimet që bëjnë më shpesh
