Italia është një nga vendet më të goditura nga Covid-19, duke numëruar 30,395 viktima dhe 218,268 të infektuar, teksa ditët e fundit duket se situata po shkon drejt përmirësimit dhe ka nisur faza e parë e hapjes.
Së fundmi, kryeministri italian, Giuseppe Conte ka dhënë një lajm shumë të mirë për qytetarët e vendit të tij, të cilët prej pothuajse 3 muajsh kanë qëndruar të mbyllur në shtëpitë e tyre për shkak të pandemisë së koronavirusit.
Kreu i qeverisë italiane ka dhënë përgjigjen e shumëpritur për të gjithë në lidhje me pushimet verore, megjithatë ai shtoi më tej se muajt në vazhdim do të jenë të vështirë pasi koronavirusi ende nuk është zhdukur.
“Këtë verë nuk do të qëndrojmë në ballkon dhe bukuria e Italisë nuk do të jetë në karantinë. Po, mund të shkojmë në det, në mal, mund të shijojmë qytet tona edhe pse këtë vit do të jetë ndryshe me rregulla dhe me shumë kujdes. Ne presim evoluimin e kornizës epidemiologjike për të dhënë indikacione të sakta në data dhe programin gjatë muajve të verës. Por muajt në vijim do të jenë të vëshirë”- ka thënë Contë Corriere della Sera”.
Lidhur me pasojat e Covid-19 në ekonominë e vendit, kreu i qeverisë tha se do të kenë një rënie të Prodhimit të Brendshëm Bruto dhe pasojat ekonomike do të jenë shumë të dhimbshme.
Disa ditë më parë Conte vizitoi Milanon, ku për herë të parë pas goditjes nga koronavirusi u ndal në Lombardi dhe tha se ky nuk është momenti për t’u dorëzuar pasi po bëhen shumë sakrifica.
”Faza 2 është e bashkëjetesës me virusin, jo e lirisë”- qartësoi Conte.
Kryeministri Conte ka hedhur poshtë idenë se Lombardia dhe Milano t’i kthehen normalitetit si zonat e tjera, sepse sipas tij nuk janë kushtet që Rajoni i Lombardisë t’i kthehen normalitetit.
“Ne po bëjmë shumë sakrifica, kjo nuk është koha për të hequr dorë. Nuk mund të ketë liri për gjithçka. Kjo qeveri nuk kërkon konsensus, ajo dëshiron të bëjë gjërat e duhura edhe nëse kjo mund të mos kënaqte qytetarët“.
