Një aksident me pasojë plagosjen e një 17-vjeçari ka ndodhur sot në Tiranë, teksa mësohet se ai po udhëtonte me biçikletë, kur është përplasur nga një makinë tip Ford.
Aksidenti ka ndodhur rreth orës 17:20, në rrugën “Don Bosko”, drejtuesi i mjetit me iniciale H.M., aksidentoi shtetasin A.M., i cili ndodhet në spital, nën kujdesin e mjekëve.
Sakaq mjeti është dëmtuar në pjesën e xhamit të përparmë nga përplasja e fortë me biçikletën, teksa nga pamjet e siguruara nga vendngjarja shihen këpucët e 17- vjeçarit të shpërndara në tokë.
Akoma nuk dihet shkaku i aksidentit dhe nëse shoferi që po ngiste mjetin po ecte me shpejtësi, por sipas deklaratës së policisë, grupi hetimor ndodhet në vendngjarje dhe vijon puna për zbardhjen e rrethanave të ngjarjes.
Njoftimi i plotë
“Më datë 08.05.2020, rreth orës 17:20, në rrugën “Don Bosco”, një mjet me drejtues shtetasin H.M., ka aksidentuar biçiklistin A.M., 17 vjeç, i cili ndodhet në spital, nën kujdesin e mjekëve. Grupi hetimor dhe shërbimet e Policisë ndodhen në vendngjarje dhe vijon puna për zbardhjen e rrethanave të ngjarjes”, shkruhet në njoftimin e Policisë.
