Drejtori i Drejtorisë së Përgjithshme të Shërbimit të Transportit Rrugor, Blendi Gonxhe, foli në lidhje me mundësinë e rritjes së çmimit të biletës të transportit urban.
Një një intervistë për “Report Tv”, ai siguroi të gjithë qytetarët se një gjë e tillë nuk do të ndodhë.
Më tej ai shtoi se për 7204 mjete nuk janë falur taksat, por i ka paguar vetë Drejtoria.
Gonxhe sqaroi, se për kompanitë e transportit do të ketë lehtësira, ndërsa ata që abuzojnë me çmimet do të ndëshkohen.
“Dua të them se kemi mundësi për të bërë propozimin që nga fondet të ndihmonim kategorinë më të goditur, që janë transportuesit e pasagjerëve, 7204 mjeteve nuk iu kemi falur taksa, por ua kemi paguar ne. Në Buxhet i kemi paguar ne. Gjithashtu, çmimi i biletës nuk do të rritet për autobusët dhe urbanët. Do të kemi lehtësira për kompanitë. Ata që abuzojnë me çmimet do të ndëshkohen”,-tha Gonxhe.
Që prej datës 12 mars, sektori i transportit urban dhe ndërqytetas ka ndërprerë punën.
Shoqatat e Transportit kanë paralajmëruar se do të rrisin me 30% çmimin e biletës, pasi do t’u duhet të punojnë me kapacitet të reduktuar.
Ndërkohë kryeministri Edi Rama, gjatë mbledhje me Komitetin Teknik, tha ditën e sotme, se ende nuk ka një plan për këtë sektor.
