Shoqatat e biznesit kanë shprehur ankesa për lëvrimin e kredive nga bankat.
Sipas tyre, bankat e nivelit të dytë po nxjerrin pengesa burokratike, për kredinë për pagat e punonjësve.
Kjo situatë e krijuar, ka lënë punonjësit pa paga për dy muaj.
“Bankat nuk japin kredinë për pagat e punonjësve. Më lehtë të marrësh kredi 10 mln euro sesa kredinë për pagat. Bankat nxjerrin pengesat burokratike. Po lënë punonjësit 2 muaj pa paga”, deklarojnë bizneset.
Ndërkohë pak ditë më parë Biznes Albania, kërkoi nga qeveria që të rishikojë marrëveshjen me bankat për kreditë.
Sipas Biznes Albania, bankat hezitojnë të japin kredi, pasi risku bie mbi to.
Duke parë vështirësitë e krijuara, Binzes Albania kërkoi nga qeveria dhe Banka e Shqipërisë, që të shtyjnë pagesat e principalit të kredive për një vit.
Kujtojmë këtu se Këshilli i Ministrave dhe bankat e nivelit të dytë një muaj më parë nënshkruan një marrëveshje për lëvrimin e kredive për bizneset, në mënyrë që të mbulojnë pagat e punonjësve
Mirëpo kjo marrëveshje ende nuk po gjen zbatim, pasi ka një hezitim nga ana e bankave për të dhënë kredi.
