Kriza ekonomike e shkaktuar nga COVID-19, ka goditur rëndë mediat në Shqipëri.
Megjithatë qeveria vazhdon të shpërfillë kërkesat e përfaqësuesve të medias, duke e lënë në mëshirë të fatit këtë sektor.
Për këtë çështje ka folur edhe presidenti Ilir Meta, në studion e “Tempora” të Sonila Meços.
Meta ndërsa ka përgëzuar punën e gazetarëve në mbulimin e pandemisë, tha se duhej të ishte menduar për një mbështetje dhe një lehtësim për situatën e tyre.
“Unë kam folur në mënyrë të qëndrueshme për këtë çështje. Gazetarët kanë bërë një punë të shkëlqyer pasi kanë qenë të ekspozuar pranë spitaleve dhe duke ndërgjegjësuar opinioni publik me raportimet e tyre. Puna e tyre është e pazëvendësueshme. Situata e tyre është kritike dhe duhet të ishte menduar për një mbështetje dhe një lehtësim për situatën e tyre, brenda mundësive të përgjithshme”., tha Meta
Ndër të tjera presidenti i kërkoi qeverisë që të reflektojë, pasi media është i vetmi pushtet ku nuk ka humbur akoma llogaridhënia dhe vendosja në një pozitë kaq të vështirë është alarmante.
“Duke pasur në konsideratë situatën e vendit tonë, pa Gjykatë Kushtetuese dhe pa një sistemi gjyqësor eficent, pa një parlament në përputhje me kushtetutën dhe ku praktikisht ka humbur llogaridhënia, përveç dhe pushtetit vendor , tani dhe ky pushteti tjetër media të vendoset në një pozitë gjithnjë e më të vështirë apo të mos garantosh lirinë e saj është alarmuese dhe ka një përkeqësim të qëndrueshëm. Prandaj kërkohet një reflektim i menjëhershëm nga qeveria, parlamenti”, vijoi presidenti.
Qeveria ndërkohë e ka përjashtuar totalisht median nga plani ekonomik.
Kreu i Unionit të Gazetarëve, Aleksandër Çipa, në një komunikim me “iconstyle.al”, është shprehur se nuk ka ende asnjë negociatë lidhur me lehtësirat për mediat dhe gazetarët.
Gjithashtu përfaqësuesi i OSBE për lirinë e media, Harlem Desir, i bëri thirrje për respektim, liri dhe mbështetje financiare, mediave që po përballen me vështirësi ekonomike.
Edhe mediat në vend si dhe Unioni i Gazetarëve, kanë bërë thirrje të njëpasnjëshme për nevojën për përfshirje në planin ekonomik, por qeveria i ka mbyllur derën kërkesave të tyre.
Mediat në Shqipëri aktualisht po përballen me një krizë të thellë ekonomike.
Shtypi i shkruar ka ndërprerë punën që në javët e para të pandemisë, ndërsa mediat audio-vizive dhe ato online, kanë reduktuar ose pezulluar pagat e gazetarëve, në pamundësi për të përballuar situatën.
