Kryeministri Edi Rama ka lajmëruar në Facenook se një 77-vjeçare është në listën e 27 të shëruarve gjatë 24 orëve të fundit nga koronavirusi.
Nënë Duhija, nga Kruja ia ka dalë të fitojë betejën nga Covid-19, ndërsa ka dalë nga spitali për tu kthyer pranë familjarëve të saj në shtëpi.
“Lajm i mirë: Nonë Duhija nga Kruja, 77 vjeç, u shërua. Edhe 120 tani me jetë e me shëndet e me të gjithë njerëzit e zemrës o nonë! *Në 24 orët e fundit, 27 të shëruar”, shkruan Rama.
Tashmë, ka shkuar në 820 numri i të prekurve nga Covid-19 në vendin tonë, pasi gjatë 24 orëve të fundit nga 270 testet e kryera, janë shënuar 17 raste të reja.
Harta e të prekurve zgjerohet me 9 raste në Tiranë, 5 në Krujë dhe 3 në Kamëz, kjo e fundit vatër familjare, teksa aktualisht janë 219 persona të prekur nga Covid-19, ndërsa 70% e pacientëve janë shëruar.
Në dy spitalet COVID po marrin shërbim 38 pacientë, 8 prej të cilëve në terapi intensive, por duhet theksuar se ditën e sotme kurba e COVID-19 pësoi një luhatje të fortë, pasi gjatë ditëve të mëparshme, rastet e reja varionin nga 6 deri në 9 të infektuar brenda 24 orëve.
