Shkolla 9-vjeçare Hillary Clinton në Kamëz është një nga shkollat që u godit nga tërmeti i 26 nëntorit, që i shkaktoi dëmtime të shumta dhe aktualisht po rikonstruktohet.
Mbrëmjen e sotme emisioni investigativ ‘Fiks Fare’, ka denoncuar veprimet e drejtorit të shkollës, i cili materialet e shkollës së shkatërruar i shet në të zezë.
Disa persona të redaksisë kanë kërkuar që të blejnë këto materiale, si pllaka mermeri, pllaka shtrimi apo edhe pjesë të tjera, duke shkuar disa herë në ambientet e rrënuara.
Te rrënojat e shkollës qëndron një njeri i besuar i drejtorit, i cili drejton të gjitha “punimet”, ku edhe ka biseduar me bashkëpunëtorët e ‘Fiks Fare’, mbi çmimet që duhet të paguajnë që të marrin këto materiale.
Sipas tij, drejtori i ka dhënë ‘dorë të lirë’ dhe këto materiale merren me më pak para se në treg, duke thënë se nëse materialet gjenden në treg me 100 lekë, ai i shet me 30 lekë.
Drejtori i kërkon qytetarëve 700 lekë për një pllakë mermeri, ndërsa thotë se “shes edhe tulla me 200 mijë lekë”, kurse tjegullat sipas drejtorit janë me 300 lekë copa.
Drejtori vijon të bëjë pazar me materialet, ndërsa në fund pas llogarive të gjata thotë “më jep 1 milionë lekë të vjetra dhe merr ç’të duash!”
Pas këtij konstatimi, Fiks Fare shkoi në Bashkinë Kamëz për të marrë informacion nëse materialet e kësaj shkolle janë shitur apo jo në të zezë dhe kryetari i Bashkisë, Rakip Suli tha:
“Një pjesë e materialeve shkuan te shkolla në Valias, ku do sistemohen nxënësit e kësaj shkolle. Shkuan disa dyer që ishin të mira, bankat dhe dërrasat e zeza. Materialet e tjera janë trajtuar si mbetje. Nuk tenderuam materialet si hekur apo pllaka se ishte vlerë e vogël, më shumë shkonin procedurat sesa materialet që ishin atje” tha Suli.
Pra, Bashkia Kamëz nuk ka bërë asnjë procedurë prokurimi për materialet e kësaj shkolle dhe veprimet e drejtorit janë anti-ligjore.
