Gjykata e Tiranës ka caktuar sot masën e sigurisë “arrest me burg” për 24-vjeçarin nga Taxhikistani, Komron Zukhurov, i cili u arrestua pak ditë më parë në Tiranë.
I riu ishte shpallur në kërkim ndërkombëtar nga Gjermania për pjesëmarrje në një celule terroriste pjesë e ISIS, e cila dyshohej se do të kryente një sulm.
Pas caktimit të masës së sigurisë, taxhiku pritet të ekstradohet drejt Gjermanisë, ku do të përballet me akuzat që rëndojnë mbi të.
Avokati i të riut, Asllan Dogjani, tha se klienti i tij kishte ardhur në Shqipëri për të takuar hallën dhe nuk është e vërtetës se ka ardhur së bashku me një person tjetër, për të kryer sulm terrorist.
Dogjani bëri me dije se ka kërkuar zbutjen e masës së sigurisë, ndërsa bëri thirrje që të mos ekzagjerohet me informacionet e përhapura në lajmë.
Më tej ai shtoi se shërbimi sekret në Taxhikistan po terrorizon familjen e tij, ndërsa vetë të riut i rrezikohet jeta në atdhe, pasi atje e kanë dhunuar, duke përdorur rrymë elektrike mbi trupin e tij.
“Kërkoj të mos ekzagjerohen lajmet, pasi sjell pasoja morale për një vend diktatorial si Taxhikistani. Shërbimi sekret ka marrë gjithë familjen e tij dhe po i terrorizon, pasi është një vend më keq se regjimi i Enver Hoxhës.
Vjen për herë të parë në Shqipëri te halla e tij, nuk ka qenë asnjë herë tjetër. Klienti ka shkuar vetë në polici, vullnetarisht, dhe është e pavërtetë që ka ardhur në vendin tonë me dikë tjetër. Ne kemi kërkuar masë sigurimi më të butë. Klientit tim i rrezikohet jeta në vendin tij, pasi atje e kanë dhunuar, duke përdorur edhe rrymë elektrike në trupin e tij. Ai ka ardhur me vizë në Shqipëri, për vizitë te halla e tij. Ai është një djalë shumë I mirë, është i martuar dhe pret një fëmijë. I ngelet hetimit në Gjermani të provojë, nëse ai ka kryer një vepër penale”, tha avokati.
