Pas më shumë se 1 viti e gjysmë bllokim Gjykatës së Lartë iu hap rruga e funksionimit në datën 11 mars, kur presidenti Ilir Meta dekretoi tre anëtarët e rinj të Gjykatës së Lartë ardhur nga radhët e juristëve, konkretisht: Sokol Sadushaj, Ervin Pupe, Ilir Panda.
Tre anëtarët e rinj, së bashku me Ardian Dvoranin, i vetmi anëtar me mandat të përfunduar të mbetur në Gjykatën e Lartë, përbëjnë kuorumin minimal të nevojshëm për të marrë vendime në tre kolegjet e kësaj gjykate atë Penale, Civile dhe Administrative.
Së fundmi, Ambasada e SHBA-së në Tiranë shprehet se do të ndihmojë Gjykatën e Lartë, që aktualisht ka një stok prej 35 mijë dosjesh, duke punësuar një ekip të veçantë avokatësh shqiptarë për të ndihmuar Gjykatën e Lartë që të veprojë me më shumë efikasitet dhe të mundësojë që gjykatësit të marrin vendime më shpejt.
“Gjykata e Lartë ka aktualisht pothuajse 35,000 dosje të prapambetura. Për të zgjidhur këtë problem, USAID dhe Këshilli i Lartë Gjyqësor Shqiptar nënshkruan një Memorandum Mirëkuptimi më 29 prill, për të ofruar ndihmën teknike të nevojshme. Sipas kësaj marrëveshjeje, një ekip i veçantë avokatësh të zotë shqiptarë do të punësohen për të ndihmuar gjykatën që të veprojë me më shumë efikasitet dhe të mundësojë që gjykatësit të marrin vendime më shpejt. Ashtu siç Shtetet e Bashkuara mbështetën fuqimisht miratimin e reformave gjyqësore, ashtu ne mbështesim fuqimisht zbatimin e plotë dhe në kohë të këtyre reformave. Drejtësia e vonuar është drejtësi e mohuar. Ne presim të shohim numrin e prapambetur të këtyre çështjeve që zvogëlohet sa më shpejt që të jetë e mundur” shkruan ambasada e SHBA.
Kujtojmë se impaktit të pandemisë së koronavirusit nuk mund t’i shpëtonte as sistemi i drejtësisë në Shqipëri, teksa që prej 10 marsit, gjykatat në mbarë vendin mbyllën dyert me një vendimt të Këshillit të Lartë Gjyqësor për të siguruar shëndetin e stafeve gjyqësore, në një kohë kur situata e përhapjes së virusit në Shqipëri ishte ende e paqartë.
Me përmirësimin e situatës KLGJ mori vendimin që Gjykatat të rikthehen në punë ditën e hënë më 27 prill, me veprimtari të kufizuar, çka do të thotë se të gjitha seancat gjyqësore të çëshjeve civile, administrative dhe penale që nuk janë raste të ngushtme, do të vijojnë të jenë të pezulluara në të gjitha gjykatat.
