Me identifikimin e rasteve të para me koronavirus në Shqipëri, qeveria vendosi mbylljen e shkollave për dy javë deri më 23 mars, e me shtimin e rasteve afati u shty deri më 3 prill.
Por, duke marrë shkas nga zhvillimet në vend Ministria e Shëndetësisë ka vendosur më 1 prill mbylljen e të gjithë institucioneve publike dhe private deri në një kohë të pacaktuar.
Në këto kushte, teksa qeveria po ndërmerr lehtësime të shumta, nxënës e studentë të shumtë janë të shqetësuar se çfarë do ndodhë me shkollat, teksa deri tani është përdorur si zgjidhje mësimi online.
Ministrja e Arsimit, Besa Shahini me anë të një lidhje live në emisionin “Open” është shprehur edhe një herë se viti shkollor nuk do shtyhet.
Shahini bëri me dije se strukturat arsimore kanë dy opsione për mbylljen e këtij viti akademik, ku njëri opsion është përllogaritja e notave për pjesën para përhapjes së pandemisë në vendin tonë ndërsa opsioni tjetër është përmbledhja e vlerësimeve të mëparshme.
“Asnjë nxënësi nuk do të humb viti shkollor, jemi të bindur për ta mbyllur. Siç po bëjnë shtete të tjera. Nxënësit që ndihen se nuk kanë mësuar aq sa duhet mund ta përsëritin vitin sërish. Jemi të përgatitur për të mbyllur këtë vit. Kemi dy opsione. Nëse kthehemi në shkolla të bëjmë vlerësimet e fundit apo opsioni i dytë nëse nuk kthehemi të bëjmë një përmbledhje sa kemi qenë në shkollë, pa u penalizuar ata që nuk kanë pasur mundësi online. Kemi parë me kujdes shtete e tjera.” tha Shahini.
Ndërsa, sa i përket universiteteve ministrja deklaroi se ata janë të pavarur nga Ministria e Arsimit, por shtoi se është në komunikim të vazhdueshëm me dekanët e rektorët dhe se nuk do ketë shtyrje më shumë se në korrik.
“Universitetet kanë një lloj autonomie në vendimarrje dhe ekonomike. Kemi biseduar me rektorët dhe ata kanë shprehur vullnetin për ta mbyllur këtë vit shkollor. Besoj se provimet dhe diplomat që do jepeshin në korrik, po ashtu do të bëhet edhe këtë vit. Nuk besoj se mund të ketë një shtyrje,”- tha Shahini.
