Ditën e djeshme policia arrestoi në zonën e “Xhamllikut” në Tiranë, Ilir Selmanin, një nga të kërkuarit për vrasjen e ish-policit Santiago Malko më 27 gusht të vitit të kaluar.
“Balkanweb” raporton, se Selmani ka mohuar të ketë lidhje me vrasjen.
Ai u ka thënë policëve se nuk e njihte Malkon, por e kishte parë vetëm në televizor.
Përsa i përket armës që mbante me vete, Selmani tha se i rrezikohej jeta nga kundërshtarët e Leonard Dukës, me të cilin ka miqësi shumëvjeçare.
“Me Leonard Dukën kam lidhje miqësie shume vjecare. Nuk e kam takuar prej shumë muajsh dhe nuk kam informacion për vrasjen e Santiago Malkos. Nuk e njoh fare, e kam parë vetëm në televizor që flitej për të. Prej muajsh kam qëndruar i fshehur dhe rrallë kur dilja levizja i armatosur, sepse më rrezikohet jeta nga kundershtarët e mi dhe të Leonardit. Më kanë thënë se Ervis Martini do të më heqë qafe”, mësohet të ketë thënë Selmani para policëve.
Arrestimi i Selmanit është bërë i mundur edhe nga monitorimi i lëvizjeve të bashkëshortes së tij, e cila shkonte dhe e takonte.
Selmani dyshohet se është pjesë e klanit Duka, i cili sipas Prokurorisë përgatiti dhe ekzekutoi planin për eliminimin e Malkos.
Sipas të dhënave në dosjen hetimore, Selmani, ka kthyer makinën në momentin që e ka udhëzuar Leonard Duka, pasi ky i fundit kishte arritur ta identifikonte dhe lokalizonte objektivin.
Ata u ndalën pikërisht në rrugën ‘Xhanfize Keko’ ku u qëllua pak minuta më vonë edhe Santiago Malko.
Një tjetër e provë e dyshimtë janë edhe pamjet e publikuara nga disa media, ku Ilir Selmani shfaqet duke mbledhur bishtat e cigareve që kishte hedhur në tokë Blendi Teta, njeriu që mendohet se survejoi lëvizjet e ish-policit Santiago Malko.
Selmani është i vetmi që ka një profil aktiv në rrjetet sociale, ku ka reklamuar gjithë aktivitetin e tij ndër vite: që nga armët, tek pijet e shtrenjta dhe makinat e luksit.
Kujtojmë këtu, se ish- polici Santiago Malko, ishte pjesë e bandës së Ervis Martinajt, rivalë të përbetuar të klanit Duka.
Malko ka qenë i përfshirë në disa ngjarje kriminale, siç është përleshja me armë n ëish-bllok më 4 tetor 2018, ku u vra Fabian Gaxha, apo edhe sherri me dy vëllezërit Lashi në vitin 2016 për një borxh prej 1 mijë eurosh.
Për vrasjen e Malkos deri më tani janë shpallur në kërkim 8 persona, të njohur ndryshe si pjesë e klanit “Duka”: Leonard Duka; Erlis Duka, Ilir Selmani, Oltian Loga, Fatmir Hyseni, Dritan Agaj, Aleksandër Maxhaku dhe Xhoni Nica.
