Numri i të infektuarve në vendin tonë ka shkuar në 518, pasi gjatë 24 orëve të fundit janë regjistruar 24 raste të reja, teksa disa minuta më parë ndërroi jetë edhe një 64-vjeçare nga Tirana, duke e çuar në 26 numrin e viktimave.
Mbrëmjen e sotme mjeku Tritan Kalo, në një lidhje me Skype për “Repolitix” tha se numri i viktimave nga COVID-19 në Shqipëri nuk do të jetë më shumë se 0.75-0.9% e të prekurve dhe për këtë ai renditi 4 arsye.
“Numri i fataliteteve nuk do ta kalojë 0.75-0.9% e të prekurve. Mortaliteti në të gjithë botën nuk do ta kalojë 1.5%. Jam më i qetë në disa plane, së pari sistemi tregoi se i mbajnë këmbët, së dyti po plotësohet me ardhjen graduale të rasteve, së treti njerëzit pak nga pak po ndërgjegjësohen, së katërti po mundohen të konceptojnë se mund të përballohen edhe nga izolimi pandemi të tilla. Duke u mësuar me këtë do të jetë shumë më e lehtë hapja graduale dhe kthimi te aktivitetet prodhuese. Por koha na tregoi se duke menaxhuar situatën kemi një binom që po funksion. Ne dhe populli që po na mirëkupton dhe e falenderoj ta përballojmë”- tha ai.
Si ndryshon kurba?
“Pas javës së 5-6, pasi arrin një lloj kulmi, vihet re një lloj horizontaliteti, por jo rrafshimi i kurbës, ecën me ulje dhe ngritje. Edhe tek ne kjo po ndodh, dhe do të vijojë në këtë formë, pasi zbulon pak nga pak edhe mikrovatra, që nuk kanë pasur zhvillime deri këto ditë, apo persona që kanë pasur kontakt dhe pasi kaluan periudhën e inkubacionit shfaqin simptomat”.
Mirëpo, Kalo ka bërë një deklaratë të papritur pasi ka shigjetuar OBSH, duke thënë se ka persona burokratë dhe të painformuar.
“Edhe në OBSH ka burokratë që jo të gjithë janë të update-uar. Edhe aty ka probleme të ndryshme, përplasje, etj. Edhe OBSH u keqorientua, në një epidemi që ishte e re dhe nuk priteshin këto përmasa. Mund të ishte mos informacioni i duhur”- tha ai.
