Krahas mjekëve, edhe efektivët e policisë janë renditur në vijën e parë të luftës sepse janë çdo ditë në rrugë, për të evidentuar personat që shkelin rregullat e karantinës, duke rrezikuar shëndetin e tyre dhe të personave të tjerë.
Ditët e fundit është raportuar rreth disa efektivëve të infektuar nga Covid-19, teksa ministri i Brendshëm, Sandër Lleshaj, ka zbuluar më shumë rreth kësaj çështjeje.
Në një lidhje me Skype për emisionin “Open” Lleshaj tha se janë 16 policë të infektuar dhe gjithsej janë 54 të karantinuar.
“Tani kem 8 punonjës policie të cilët janë aktiv me virusin. Janë gjithsej 16 punonjës policie të infektuar dhe kemi 52 policë të karantinuar”, u shpreh ministri.
Më tej, Lleshaj u shpreh se masat do të forcohen ndërkohë që hapja graduale do të fillojë, por do të shtohen sanksionet për shkelësit.
Sakaq, ministri foli edhe për gjobat e vëna nga policia për shkelësit.
“Kemi 11 gjoba për qytetarët që janë dashur të vetëkarantinohen dhe e kanë thyer këtë masë. Janë 266 biznese të gjobitura pasi kanë hapur biznesin në kohë kur është dashur ta mbajë mbyllur. Janë gjobitur edhe 5890 qytetarë të gjobitur pasi kanë shkelur oraret e qarkullimit. Këto orare janë shkelur pa asnjë motivacion”, tha Lleshaj.
Kujtojmë se ditën e sotme ka shkuar në 494 numri i të prekurve nga Covid-19 në vendin tonë, pasi në 24 orët e fundit janë shënuar 19 raste të reja, teksa numri i viktimave ka shkuar në 25.
Tirana dhe Shkodra janë dy vendet më të prekura, përkatësisht me 237 dhe 71 të infektuar.
