Ditën e sotme, Ministria e Shëndetësisë ka njoftuar se numri i të infektuarve nga COVID-19 në vendin tonë ka shkuar në 89 persona nga 803 teste të kryera në total.
Në 24 orët e fundit janë kryer 33 teste dhe rastet e reja janë regjistruar në Tiranë, Durrës, Korçë dhe Rrogozhinë, teksa ky është numri më i lartë i të infektuarve brenda 24 orësh në vendin tonë.
Prej tyre, 43 persona janë shtruar në Spitalin Infektiv dhe 4 prej tyre janë në gjendje të rëndë, në terapi intesive, teksa të tjerët janë në gjendje të stabilizuar.
Ditën e sotme u bë me dije se para Urgjencës në QSUT so ngrihen çadra për të bërë triazhimin e pacientëve.
Pra, të gjithë personat që paraqisin simptomat e COVID-19 do tu nënshtrohen testeve pikërisht në këto ambiente, jashtë Spitalit, për të evituar kontaktin dhe mundësinë e përhapjes së infeksionit te personeli shëndetësor dhe pacientët e tjerë.
Më herët ditën e sotme, mjeku Tritan Kalo bëri me dije se në Spitalin Infektiv janë shtuar 12 respiratorë dhe po punohet për përpunimin e infrastrukturës.
Së fundmi, News 24 bën me dije se nga 13 të infektuarit e rinj, 3 janë nga personali ndihmës në Spitalin e Sanatoriumit, duke e çuar në 10 numrin e bluzave të bardha të prekura në këtë spital dhe të gjithë kanë lidhje me viktimën e dytë në vendin tonë, 66-vjeçari që ndërroi jetë pak ditë më pare.
Dyshohet se si viktima, edhe mjekët janë infektuar nga një i afërm i të moshuarit që e ka vizituar në spital, pas ishte kthyer nga Italia, teksa ende nuk dihet fati i tij.
Kujtojmë se në Itali kanë humbur jetën shumë mjekë dhe janë infektuar shumë të tjerë, prandaj është me shumë rëndësi të tregohemi të sinqertë rreth historive të udhëtimeve, pasi rrezikojmë jetën e heronjve të kësaj situate.
