Pacienti i parë i shëruar nga koronavirusi në Shqipëri ka lënë spitalin.
Lajmi është dhënë nga kryeministri Edi Rama nëpërmjet një postimi në rrjetet sociale.
Bëhet fjalë për 54-vjeçarin me iniciale V.K., i cili është babai i 28-vjeçarit P.K., i cili konsiderohet si pacienti 0 në Shqipëri.
54-vjeçari iu nënshtrua dy herë testit për koronavirus, duke rezultuar negativ.
Ai tashmë do të qëndrojë në shtëpi i vetëkarantinuar për 14 ditë.
Shefi i qeverisë bëri me dije mbrëmjen e djeshme, se gjithashtu është drejt shërimit edhe një pacient tjetër.
Bilanci i COVID-19 në vendin tonë është 76 të infektuar, nga të cilët dy viktima dhe një i shëruar.
Në repartin e Infektivit ndodhen 37 persona, 4 prej të cilëve mbahen në terapi intensive.
Pjesa tjetër e të prekurve ndodhen të karantinuar në shtëpi, nën kujdesin e mjekut të familjes dhe autoriteteve shëndetësore vendore.
Tirana është qyteti me numrin më të madh të të prekurve me 55 raste, më pas ndjekin Fieri me 8, Durrësi me 5, Kavaja, Rrogozhina, Lushnja dhe Elbasani me 2.
