Policia ka vijuar me zbatimin e masave për parandalimin e përhapjes së COVID-19.
Si rezultat i kotrolleve, gjatë 24 orëve të fundit, u është hequr patenta 98 drejtuesve të mjeteve si dhe u janë bllokuar automjetet.
Gjithashtu u arrestua 24-vjeçari me iniciale K.A., pasi u kap duke drejtuar mjetin në gjendje të dehur.
Për shkelje të orarit të lëvizjes, janë gjobitur 190 shtetas, ku dy prej tyre janë proceduar penalisht për kundërshtim të policisë.
Njoftimi i Policisë:
Policia e Shtetit: Në zbatim të masave kufizuese të shpallura nga qeveria shqiptare, për vënien në kontroll të pasojave që sjellin përhapjen e COVID-19, strukturat e Policisë kanë vijuar kontrollet në të gjithë territorin.
Në të gjithë vendin, gjatë 24 orëve të fundit janë evidentuar 98 drejtues mjetesh që kanë shkelur urdhrin e ndalim qarkullimit, të cilët janë ndëshkuar me heqje të lejes së drejtimit dhe bllokim mjeti, në zbatim të Aktit Normativ Nr. 3, datë 15.03.2020, ”Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga virusi COVID-19″, si dhe është arrestuar në Kavajë shtetasi K. A., 27 vjeç, pasi u kap duke drejtuar automjetin në gjendje të dehur.
Gjatë 24 orëve të fundit, nuk zbatuan urdhrin e dhënë për qëndrimin në banesë në oraret kufizuese, 190 shtetas, të cilët qarkullonin me biçikleta apo në këmbë, në oraret e ndaluara, pa ndonjë shkak apo arsye dhe për këtë u ndëshkuan me masën administrative 10.000 lekë, ndërsa 2 prej tyre, në Shkodër, janë proceduar në gjendje të lirë, për kundërshtim të punonjësit të Policisë.
Strukturat e Policisë vijojnë kontrollet dhe monitorimet pa ndërprerë, me qëllim zbatimin e masave në funksion të parandalimit të COVID-19.
Strukturat e Policisë vijojnë kontrollet dhe monitorimet pa ndërprerë, me qëllim zbatimin e masave në funksion të parandalimit të COVID-19.
Numri i të infektuarve nga COVID-19 në vendin tonë ka shkuar në 76, në mesin e të cilëve dy viktima dhe një i shëruar.
Tek Infektivi ndodhen 37 pacientë, 4 prej të cilëve në terapi intensive, ndërsa ka filluar funksionimin edhe karantina te Kavalishenca në Durrës.
Autoritetet vijojnë me thirrjet për respektimin e rregullave të higjienës dhe distancimit social.
Ndërkohë me urdhër të kryeministrit, që nga dita e sotme në orën 13:00 deri të hënën në orën 05:00 është e ndaluar lëvizja e këmbësorëve.
