427 viktimat e regjistruara në 24 orët e fundit e kanë çuar numrin total në 3,405 të vdekur, duke bërë që Italia të renditet e para në rang botëror për numrin e të vdekurve, pasi në Kinë për 3 muaj u shënuan 3,245 viktima.
Ndërkohë deri tani, janë mbi 41,035 persona të infektuar dhe në këto kushte, frika në vendin tonë është e madhe se mund të kemi të njëjtin fat si vendi fqinj.
Mirëpo, drejtoresha e Institutit të Shëndetit Publik Albana Fico deklaron se Shqipëria nuk ka qasje me skenarin Italian.
E ftuar në “Real Story”, Fico tha se masat janë marrë shumë shpejt, ndërkohë që nuk ka ndryshuar standardi i punës me shpërndarjen e rasteve në Kavajë apo në Fier.
“E kam vështirë t’i shoh gjëra bardhë e zi, profesioni im ka të gjitha ngjyrat e spektrit. Në këtë ditët e fundit ne shikojmë që jemi në një situatë tjetër për sa i përket gjendjes së Coronavirusit. Ne kaluam nga gjendja e epidemisë në gjendjen e pandemisë. Ka një mesatare 4-5 rastesh në ditë. Nuk është lajm i keq në sensin e asaj të përhapjes në një qytet tjetër sepse ne e dimë që nuk mund të rrijë në kufijtë e një qyteti. Problemi është në të vërtetë në Tiranë kemi raste të lidhura me rastin e parë apo në Fier, por kjo është shumë larg asaj që ne duam dhe gjykojmë. Është një realitet. Ne nuk ndryshojmë standardin e punës në raport me rastin në Kavajë, Durrës apo Fier.Ne nuk kemi qasjen me skenarin italian për 2 arsye. Së pari në kushtet ku ndodhemi kemi marrë një seri masash shumë shpejt për të lokalizuar infeksionin dhe për të mos lejuar transmetimin e mëtejshëm të tij. Është një gjë që është në dinamikë. Kjo linjë që është vendosur për publikun është shumë e rëndësishme”.
Virusi që lindi në Kinë në fund të 2019, ka shkaktuar deri tani rreth 10, 000 viktima dhe ka infektuar mbi 241,000 persona në 177 shtete.
OBSH ka shpallur pandeminë, teksa epiqendra e virusit tashmë është zhvendosur në Europë, në një kohë kur Kina po rimerr veten dita-ditës dhe madje po ndihmon shtetet e tjera të prekura.
Qeveria shqiptare ka ndërmarrë një sërë masash për të parandaluar përhapjen e Coronavirusit, teksa është kufizuar qarkullimi i makinave dhe i këmbësorëve.
Gjithashtu ka nisur aplikimi i gjobave për ata që nuk respektojnë rregullat e vetëkarantinimit, kompanitë që nuk marrin masat ndaj Coronavirusit dhe tregtarët që rrisin çmimet në mënyrë abuzive.
