Kryeministri Edi Rama duket se nuk ka ndërmend të ndalet në masat parandaluese për përhapjen e COVID-19, pasi mbrëmjen e sotme ka njoftuar të tjera masa.
Në një lidhje me Skype për ‘Open’ ai ka thëne se do të ketë ulje të rrogave për ministrat deputetët, por dhe për vetë atë, pasi edhe ata që janë në majë të piramidës do sakrifikojnë sepse jemi në një periudhë lufte dhe të gjithë duhet të marrin pjesë në luftë.
“Ne do të shkurtojmë rrogat tona si qeveri, rrogat e atyre që janë në majë të piramidës. Do të shkurtojmë rrogat e deputetëve të Kuvendit të Shqipërisë. Kjo është simbolike por për të dhënë mesazhin se do të lëmë diçka në mënyrë që ata që nuk kanë se me çfarë të shtyjnë në fund të muajit të kenë diçka”, tha Rama.
Po ashtu, Rama foli edhe për biznesin e madh apo oligarkët siç i cilësoi ai, të cilët sipas tij kërkojnë “donacione” nga qeveria në situatën në të cilën ndodhet vendi për shkak të Coronavirusit.
Kreu i qeverisë u shpreh se nëse ekonomia bie, oligarkët janë të parët që do të paguajnë, “në çdo aspekt” dhe duke marrë shembullin e Milanos ku 50 restorante luksoze që u mbyllën për shkak të Coronavirusit dhe dhanë donacione për spitalet, Rama tha se këtë shembull mund ta ndjekin dhe oligarkët në Shqipëri.
“Nëse këtu bie ekonomia dhe nëse këtu ne nuk qëndrojmë dot në këmbë pasi të dalim nga kjo luftë, janë ata të parët që do paguajnë, në çdo aspekt.Unë e di shumë mirë se për çfarë flasin ata dhe i di shumë mirë për çfarë propozimesh flasin ata. Më bëjnë përshtypje se gjërat që ata kërkojnë sot i kanë kërkuar dhe kur s’ka pasur luftë. 50 restorantet më luksoze të Milanos dhanë donacione për spitalin kur u mbyllën. S’po them që ata të japin donacione, në fakt edhe mund të bëjnë, mirë është të bëjnë. Por të mos kërkojnë të paktën në këtë situatë donacione nga qeveria. Donacionet tona do jenë për ata që janë në nevojë”.
Më herët mbrëmjen e sotme Rama u shpreh se masat janë ilaç i vetëm në këtë luftë për sa kohë nuk është krijuar ende asnjë ilaç që ta luftojë, teksa u përfshi edhe në një debat me Eni Vasilin.
Kur pritet të përfundojë kjo luftë? Përgjigjet Rama, “Futeni mirë në kokë se prioritet është jeta”
“Mbaje mend atë që të thashë, mos e përsërit më!”, Rama përplaset ashpër me Eni Vasilin
Kujtojmë se qeveria deri tani ka marrë shumë masa të rrepta për qytetarët, por nuk e ka ende gati një plan rreth zgjidhjes së krizës ekonomike që mund të kalojë vendi si pasojë e virusit.
Ditën e sotme, ka reaguar edhe Dhoma Amerikane e Tregtisë që ka ngritur alarmin, mbi hartimin urgjent të një plani konkret për të lehtësuar bizneset, pasi rrezikohet shkatërrimi i ekonomisë.
“Qeveria të hartojë plan urgjent masash, në të kundërt ekonomia do shkatërrohet”
Deri tani shtete të ndryshme kanë ndërmarrë nisma e paketa të rëndësishme rreth mënjanimit të krizës ekonomike që mund të shkaktojë virusi.
Qeveria gjermane ka miratuar paketën më të madhe të ndihmës ekonomike të Gjermanisë, me vlerë 550 miliardë euro për kompanitë e ndryshme, duke iu ofruar atyre kredi për të mbajtur bizneset e tyre hapur.
Kryeministri italian Giuseppe Conte, ka miratuar dekretin ‘Cura Italia’ për emergjencën e Coronavirusit, duke ofruar 25 miliardë euro për familjet dhe bizneset.
Ditën e djeshme Britania e Madhe hartoi planin e saj, që parashikon: 1 miliardë paundë ndihmë direkte për familjet në nevojë që shpërndahet menjëherë nga Këshillat Vendore; 3 muaj shtyje të pagesës së kredisë; 330 miliardë paundë para në treg për të ndihmuar biznesin; 25 mijë paundë ‘cash’ për çdo biznes të vogël (pub, bar, dyqan i vogël) së bashku me përjashtim 1 vit nga taksat; një paketë mbështetëse e mundshme posaçërisht për linjat ajrore dhe aeroportet; ndihmë direkt në para për këdo që humb punën në rreth 90 paund në javë.
