Kisha Orthodhokse Autoqefale e Shqipërisë, ka njoftuar masat e reja shtesë për shkak të koronavirusit.
Shërbesat në kishë do të ndërpriten, por do të qëndrojnë të hapura vetëm për lutje personale.
Liturgjia hyjnore e të dielave dhe Ungjillizimi i të premtes, do të zhvillohen me dyer të mbyllura në Kishën e Trinisë së Shenjtë të Qendrës Sinodike në Tiranë dhe do të transmetohen në radio.
Kisha Orthodhokse bën thirrje për kujdes, dhe lutje e besim te perëndia për të përballuar këtë situatë.
“Duke parë situatën e re të krijuar, kur rastet me Covid-19 po shtohen, përsëri me ndjenjën e përgjegjësisë dhe të dashurisë për grigjën tonë, njoftojmë si më poshtë klerin dhe besimtarët orthodhoksë për disa masa të tjera mbrojtëse shtesë:
1) Kishat orthodhokse do të vijojnë të jenë të hapura për lutje personale. Por, për të shmangur grumbullimin e njerëzve dhe për të kufizuar kontaktet fizike, si masë për kufizimin e përhapjes së virusit, nuk do të zhvillohet asnjë shërbesë.
2) Deri në një njoftim tjetër të ri, Liturgjia Hyjnore e të dielave dhe e të kremtes së Ungjillëzimit do të kryhet vetëm në kishëzën (kapela) e Trinisë së Shenjtë të Qendrës Sinodike në Tiranë, me dyer të mbyllura, dhe do të transmetohet drejtpërdrejt nga Radio “Ngjallja” nëpërmjet valëve FM dhe internetit.
3) Po ashtu edhe në Mitropolitë e tjera do të kryhet Liturgjia me dyer të mbyllura në kishëza (kapela) të vogla.
Kujtojmë se kjo pandemi duhet të përballohet me shumë kujdes, pa panik, me lutje dhe besim tek Perëndia, si edhe me dashuri dhe përgjegjësi të madhe për të afërmit”, njofton Kisha Ortodokse.
Edhe Komuniteti Mysliman dhe Kisha Katolike kanë marrë masa më herët, për të shmangur grumbullimet e njerëzve, për shkak të koronavirusit,
Bilanci i COVID-19 në vendin tonë është 55 të prekur dhe dy viktima.
Qeveria ka ndërmarrë një sërë masash për parandalimin e përhapjes së koronavirusit, duke kufizuar qarkullimin e makinave dhe lëvizjen e këmbësorëve.
Gjithashtu të gjithë ata që nuk respektojnë rregullat e vetëkarantinimit do të gjobiten me 5 mijë euro.
Prej ditësh në rrugë ndodhen ushtria dhe policia, të cilat po mbikëqyrin zbatimin e urdhërave.
