Më 9 mars u identifikuan 2 rastet e para me COVID-19 në vendin tonë dhe tashmë janë 55 të infektuar, teksa një 73-vjeçare ka humbur jetën.
Mbrëmjen e sotme, nëpërmjet një lidhje me Skype për emisionin “Opinion” drejtuesja e Shërbimit të Inteligjencës Epidemiologjike, pjesë e Task-Forcës së Ministrisë së Shëndetësisë, Eugena Tomini ka dhënë detaje lidhur me gjendjen e 55 pacientëve të infektuar.
Tomini u shpreh se në spitalin Infektiv janë shtruar persona të grupmoshave 25 deri të 65 vjeç, teksa tha se moshat e reja nuk kanë sëmundje bashkëshoqëruese, ndërsa personat në moshë më të madhe kanë por jo të agravuar.
Lidhur me mjekët që kanë rezultuar pozitivë ndaj Coronavirusit, Tomini u shpreh se ata janë vetëkarantinuar në shtëpitë e tyre dhe janë në gjendje të mirë.
“Të infektuarit janë të grupmoshës 25-65 vjeç. Janë në situatë stacionare. Nuk paraqesin shenja të agravuara. 32 nuk janë në spital, po rrinë në shtëpi. Janë izoluar në një dhomë të shtëpisë dhe kanë kufizuar të gjitha lëvizjet. Grupmosha e re nuk ka sëmundje bashkëshoqëruese. Të tjerët kanë po jo të agravuar. Ndërsa mjekët e infektuar janë të vetëizoluar në banesat e tyre,”-tha mjekja.
Sa u përket testeve për COVID-19, Tomini u shpreh se Shqipëria ka kapacitet për të bërë 200-300 teste në ditë.
“Po testojmë çdo rast të dyshuar. Do ta shtrijmë nivelin e testimeve. Në ditë ne mund të testojmë 200-300 testime në ditë,”-u shpreh ajo.
Në rang botëror deri tani janë shënuar 7,953 viktima dhe janë regjistruar mbi 197 ,000 të infektuar në 163 shtete, ndërsa në vendin tonë deri tani ka humbur jetën 1 person dhe janë infektuar 55 të tjerë, teksa në Kosovë janë 19 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
