Bilanci i koronavirusit në vendin tonë është 51 të infektuar dhe një viktimë.
Ministri e Shëndetësisë bëri me dije dje se 20 prej pacientëve, janë të shtruar në godinën e Infektivit.
Mjeku Tritan Kalo nëpërmjet një postimi në rrjetet sociale, ka treguar ilaçet me të cilat po kurohen të prekurit të Infektivi, të cilat janë “Actemra”. “Tamiflu” dhe “Aluviol”.
Më tej Kalo shkruan, se mjekëve shqiptarë nuk u mungon humanizmi dhe do të bëjnë gjithçka të mundshme për jetën e pacientëve.
“….MBRËMJE në Shërbimin e Sëmundjeve Infektive…..Jemi këtu në krye të detyrës së bashku me Prof. N. Çomon, Dr. N. Kryemadhin, Dr. M. Qaton, Dr. Dr. A. Domin, Dr. A. Hoxhën si dhe një grup dijeplotë e vullnetplotë Infermjeresh, të mbështetur nga Sanitaret, Koordinatoret, etj….Bashkëqytetarë, ju DUHET të BINDENI se ato çka lexoni në shtypin botëror në lidhje me MUNDËSITË më të fundmit terapeutike të mjekimit, të të gjitha formave klinike të Covid-19 edhe ne po ua ofrojmë të sëmurëve tanë, për të bërë të mundur shpëtimin e jetëve të tyre….NUKU na mungojnë mjetet për t’u shërbyer, POR mbi të gjitha ju sigurojmë se NUKU na mungon humanizmi, dija e vullneti ynë për të bërë gjithshka të mundëshme në luftën për jetën e të sëmurëve tanë….Ju duam shumë, na mirëkuptoni dhe na mirëbesoni…Njëkohësisht ajo çka na frymëson është edhe fakti se, SOLIDARITETI dhe MBËSHTETJA e kolegëve mjekë e infermjerë NUKU na mungon….BASHKËRISHT ne do t’ia dalim mbanë”,shkruan Kalo.
Për të parandaluar përhapjen e koronavirusit, qeveria ka ndërmarrë një sërë masash shtrënguese.
Me urdhër të kryeministrit Edi Rama është ndaluar qarkullimi i makinave përtej fashave orare të përcaktuara në aktin normativ.
Qytetarët gjithashtu duhet të ndërpresin lëvizjen pas orës 18:00, si dhe nuk duhet të mblidhen nëpër parqe apo ambjente të hapura, përndryshe do të aplikohen gjoba.
Për personat e ardhur nga Italia, të cilët nuk vetëkarantinohen, Rama paralajmëroi gjoba deri në 5 mijë euro.
Për të zbatuar urdhërat e qeverisë, në rrugët e vendit prej ditësh, policia dhe ushtria kanë ngritur pika kontrolli.
