Thirrja e autoriteteve për ndërgjegjësim dhe vetëkarantinimin e personave të ardhur nga Italia është thelbësore në këtë situatë në të cilën gjendemi.
Mirëpo, jo të gjithë janë të vetëdijshëm rreth saj dhe mosndjekja e udhëzimeve mund të shkaktojë probleme të mëdha, siç raportohet së fundmi nga qyteti i Beratit.
Drejtoresha e Spitalit Rajonal Berat, Edlira Shkëmbi, ka bërë me dije se stafi mjekësor është vetëkarantinuar mesditën e sotme.
Në orën 09:30 të këtij mëngjesi një ambulancë ku ndodheshin një mjeke, një infermiere dhe shoferi i ambulancës ka shkuar në një banesë në lagjen “Çlirim”,pasi janë njoftuar se një paciente asmatike është në gjendje të rëndë.
Pasi kanë shkuar në banesën e 50-vjeçares, stafi mjekësor ka konstatuar se pacientja nuk kishte shenja klinike të krizës asmatike, nuk kishte temperaturë dhe shenjat vitale ishin normale.
Ajo kishte disa ditë me kollë dhe dhimbje fyti dhe pasi ishte pyetur nëse ka patur histori udhëtimi në Itali është përgjigjur “Jo”.
Përgjigje e cila do rezultonte më pas një gënjeshtër.
Pasi dolën nga banesa, stafi mjekësor kontaktoi me një nga fqinjët e pacientes e cila u tregoi se 50-vjeçarja kishte një javë që ishte kthyer nga Italia; fakt që është konfirmuar edhe nga pacientja pas rikthimit të stafit në banesë.
Menjëherë është njoftuar 127 dhe epidemiologu për kryerjen e tamponit për pacienten dhe stafin mjekësor që ishin në kontakt me pacienten, të cilët janë vetëizoluar deri në ardhjen e përgjigjes së analizave.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
