Gjatë ditës së sotme u raportua në media, se kufiri me Kosovën dhe kalimi në Qafë Botë ishin mbyllur, si masë parandaluese për përhapjen e koronavirusit.
Policia Kufitare ka përgënjeshtruar informacionin, duke thënë se të gjitha pikat e kalimit me Kosovën, Malin e Zi, Maqedoninë e Veriut dhe Greqinë janë funksionale.
Në njoftimin e policisë thuhet se po vijon përpunimi i dokumentacionit të qytetarëve dhe automjeteve, duke respektuar masat për mbrojtjen nga koronavirusi.
Përsa i përket pikës kufitare të Qafë Botës, policia bën me dije, se pala greke po kryen dezinfektim dhe në përfundim të këtij procesi do të jetë e hapur nga të dyja krahët.
Policia u ka bërë thirrje qytetarëve që të minimizojnë lëvizjet drejt qyteteve ku është ndaluar qarkullimi apo drejt pikave kufitare.
Policia Kufitare
Nisur nga disa lajme që qarkullojnë në media online në Shqipëri e Kosovë, se janë mbyllur pikat e kalimit me Kosovën, bëjmë me dije se:
Të gjitha pikat e kalimit me Kosovën, Malin e Zi, Maqedoninë e Veriut dhe Greqinë, janë funksionale dhe vijon përpunimi i dokumentacionit të qytetarëve dhe automjeteve, duke respektuar dhe zbatuar masat e marra për mbrojtjen nga COVID-2019, si dhe për parandalimin e përhapjes së tij.
Pika e Kalimit Kufitar në Qafë Botë, Sarandë, është funksionale. Për momentin, pika nga pala greke është e mbyllur sepse po kryejnë dizinfektimin dhe menjëherë në përfundim të dizinfektimit, edhe nga pala greke do jetë e hapur.
Policia Kufitare kërkon mirëkuptimin dhe bashkëpunimin e medias. Para se të publikojnë lajme të marrin konfirmim zyrtar, për të mos krijuar panik apo dizinformim tek qytetarët.
Policia e Shtetit këshillon që qytetarët të minimizojnë lëvizjen me mjete në qytetet ku është ndaluar qarkullimi apo në drejtim të qyteteve ku ka Pika Kufitare.
Policia Kufitare po plotëson të gjitha detyrimet për intervistimin e plotësimin e formularëve në të gjitha PKK-të, për të bërë të mundur ndjekjen në vijim të rasteve të dyshuara për shtetas shqiptarë apo të huaj që hyjnë në Shqipëri dhe mund të jenë të infektuar potencialë me COVID-19.
Aktualisht në vendin tonë janë shënuar 33 të infektuar dhe një viktimë nga koronavirusi
Qeveria ka marrë disa masa shtrënguese, duke pezulluar qarkullimin e mjeteve private deri të dielën në mesnatë, duke mbyllur shkollat e lokalet, si dhe duke anuluar aktivitetet kulturore e tubimet.
