Ministrja e Shëndetësisë, Ogerta Manastirliu ka dhënë detajet më të fundit përsa i përket situatës së koronavirusit në vendin tonë.
Duke folur nga foltorja e Kuvendit, ministrja u shpreh se deri më tani janë testuar 31 persona, të cilët kanë rezultuar negativ.
“Ajo cfarë të gjithë vendet e botës janë duke bërë është forcimi i vigjilencës. E rëndësishme sot për të thënë, se edhe qytetarët tanë janë shumë të interesuar të dinë, është se aktualisht Shqipëria nuk ka asnjë rast të konfirmuar të prekur, deri në këto moment që flasim, janë realizuar disa teste në raport me peronat që kanë shfaqur simptomat, janë 31 të testuar që kanë rezultuar negativ”, tha Manastirliu.
Më tej ajo shtoi, se janë kontrolluar mbi 1 mijë udhëtarë, ndërsa një punë e madhe po bëhet edhe për mbrojtjen e personelit.
Manastirliu gjithashtu bëri me dije, se në buxhetin e spitaleve për rritjen e stokut të ilaçeve janë shtuar 1 milion dollarë, si dhe janë shpërndarë 1.2 milion maska për stafin dhe ekipet shëndetësore.
Për personat që kthehen nga vendet e prekura, ministrja përsëriti apelin për vetëkarantinimin për 14 ditë.
