Pas kallëzimit nga Meta në SPAK, ministrja e Drejtësisë Etilda Gjonaj ka dalë në një deklaratë për mediat ku ka folur më gjerë rreth padisë së presidentit.
Gjonaj tha se nuk ka qëllim të komentojë fjalët e padenja që janë vënë në drejtim të saj përmes presidentit apo zëdhënësit të tij, por për të dhënë argumenta mbi gjithë pretendimet e Metës.
Po ashtu, ministrja i ka dalë në mbrojtje edhe Arta Vorpsit, teksa tha se Meta nuk u shpreh brenda 30 ditëve duke bërë që Vorpsi, e renditura e para nga KED, të kalojë automatikisht si anëtare e Gjykatës Kushtetuese.
Ajo theksoi se afati 30 ditor i përcaktuar nga ligji është bërë me qëllim që të mos lejohet bllokimi i emërimeve në Gjykatën Kushtetuese nga vullnete politike.
Pas kësaj deklarate regoi edhe sekretari i Përgjithshëm i Partisë Demokratike, Gazment Bardhi me anë të një statusi në “Facebook” shkruan se Gjonaj duhet të gjejë një avokat, në vend që të mashtrojë qytetarët, pasi sipas tij, edhe nëse vetë Edi Rama do ta drejtojë mbledhjen SPAK, ajo është e pambrojtshme.
Së fundmi, ka reaguar edhe Presidenca, ku me anë të një statusi në rrjetet sociale, zëdhënësi i Presidencës, Tedi Bushi ka publikuar nenet për shkeljet për të cilat Presidenti Meta e ka paditur Gjonajn në SPAK.
Sipas Blushit tashmë është koha për të dhënë llogari dhe se ministrja duhet të tregojë shokët.
Statusi i plotë i Tedi Blushit
ME QETËSI DHE DREJTËSI, ERDHI KOHA PËR LLOGARI!
Presidenti i Republikës, Sh.T.Z Ilir Meta ka kallëzuar penalisht ministren e Drejtësisë Etilda Gjonaj, së bashku me vartësit e saj, për këto vepra penale:
1.“Shpërdorim i Detyrës”, parashikuar nga neni 248 i Kodit Penal;
2.“Ushtrimi i ndikimit të paligjshëm ndaj personave që ushtrojnë funksione publike”, parashikuar nga neni 245/1 i Kodit Penal;
3.“Falsifikim i dokumenteve”, parashikuar nga neni 186 i Kodit Penal;
4.“Përvetësimi i titullit apo i detyrës shtetërore”, parashikuar nga neni 246 i Kodit Penal.
Shoqja Etilda me deklaratën e saj sot nuk u dha asnjë shpjegim shkeljeve të ligjit që ka konsumuar, por përballë fakteve të pakundërshtueshme, vijoi avazin: retorikë me veten. Me daljen e sotme, shoqja Etilda, ka pranuar tërësisht fajësinë për të gjitha veprat penale për të cilat ajo është akuzuar. Shoqja Etilda nuk mundi të arsyetonte dot, se cila qe baza ligjore që e autorizon apo i jep të drejtë Ministrisë së Drejtësisë të kërkojë apo të urdhërojë botimin në Fletoren Zyrtare të një akti që nuk ishte nxjerrë prej institucionit të saj! Shoqja Etilda, nuk i dha përgjigje pyetjes, cila është ajo dispozitë e Kushtetutës dhe e Ligjit që lejon botimin në Fletoren Zyrtare të akteve të Këshillit të Emërimeve në Drejtësi. Shoqja Etilda, para se të përmendë në mekje e sipër nenet 3 dhe 4 të ligjit nr. 78/2014 “Për Qendrën e Botimeve Zyrtare”, bën mirë t`i lexojë më parë vetë. (Lexoji mirë nenet e mëposhtme). Pra shoqja Etilda, vërtet ka dashur të bëjë publik sipas porosisë së shefit së saj, një akt të KED-së në Fletoren Zyrtare, po ka harruar të lexojë të gjithë ligjin, ku sanksionohen se në Fletoren Zyrtare botohen vetëm ato akte që përcakton Kushtetuta dhe ligji. Ky vendim i KED-së, edhe pse shoqja Etilda ka dëshirë t`i bëjë reklamë, nuk lejohet të botohet në Fletore Zyrtare. Shoqes Etilda, bashkë me deklaratën që i dhanë të lexonte, duhet t`i kishin dhënë edhe nenin 232, të ligjit nr. 115/2016, “Për organet e qeverisjes së sistemit të drejtësisë”, që përcakton se ku botohen aktet e KED për renditjen e kandidatëve. Shoqja Etilda, anashkaloi sqarimin për falsifikimin e dokumenteve shtetërore, kur vet Kuvendi i Shqipërisë, nuk i kishte kërkuar botimin në Fletore Zyrtare. Dita e shtunë e datës 9 nëntor 2019, kur shoqja Etilda dhe celula mafioze në Ministrinë e Drejtësisë, ka dalë në punë, është një prej elementëve që provon anën subjektive të konsumimit me nxitim dhe dashje të veprave penale, ndikimit të paligjshëm, falsifikimit, dhe shpërdorimit të detyrës. Sa për hapjen e negociatave me BE-në, duhet ta dish se Kryekushti do të jetë hetimi dhe ndëshkimi i krimit Kushtetutes që keni bërë ju si grup i strukturar kriminal. Po pse u lodhe kaq shumë moj shoqe e vërtetë Rilindase, për të mos thënë asgjë?! Etilda, trego shokët! ME QETËSI DHE DREJTËSI, ERDHI KOHA PËR LLOGARI!
Më datë 21 shkurt, Meta deklaroi se ministrja e Drejtësisë, Etilda Gjonaj ka shkelur ligjin dhe se priste prej saj dhënien e dorëheqjes.
Kujtojmë se mes ministres dhe presidentit ekziston gjithashtu edhe një lidhje familjare që e zbuloi vetë Monika Kryemadhi e cila nuk i kurseu akuzat ndaj Gjonajt.
“Halabakja e rrugës është kushërira e presidentit”! Monika Kryemadhi shpërthen ndaj ministres Gjonaj
Nga ana tjetër, presidenti Meta ka ftuar të gjithë qytetarët në një revoltë kundër qeverisë më 2 mars.
