27-vjeçari Emrah Mejdani, është kapur në flagrancë nga policia.
Ai kishte shkuar të grabiste shtëpinë e një 63-vjeçari, me iniciale H.A., në rrugën “Siri Kodra”, në Tiranë.
I zoti i shtëpisë, pasi e ka pikasur, ka tentuar ta ndalojë.
Në përpjekje për t’u larguar Mejdani ka goditur të moshuarin, duke i shkaktuar dëmtime të lehta.
Gjithsesi, 27-vjeçari nuk arriti të largohej pasi u kap në afërsi të banesës nga forcat “Shqiponja”.
Siç bëhet me dije nga policia, i riu ka qenë i dënuar edhe në Itali për “Vjedhje”.
Dyshohet se 27-vjeçari fshihet edhe pas disa vjedhjeve të tjera në kryeqytet, disa prej të cilave mund t’i ketë kryer në bashkëpunim.
Kështu, blutë po vijojnë hetimet për dokumentimin e ngjarjeve të tjera dhe identifikimin e bashkëpunëtorëve.
Nga ana tjetër, materialet i janë referuar Prokurorisë së Rrethit Gjyqësor Tiranë, për veprën penale “Vjedhja, e mbetur në tentativë” dhe “Plagosje e lehtë me dashje”.
Njoftimi i policisë Tiranë
“Parandalohet vjedhja e një banese, arrestohet në flagrancë një shtetas, falë telefonatës nga qytetarët dhe reagimit në kohë të Policisë. Specialistët për Hetimin e krimit në Komisariatin e Policisë Nr. 4, falë bashkëpunimit me qytetarët, kanë bërë arrestimin në flagrancë të shtetasit E. M., 27 vjeç, banues në Tiranë. Arrestimi i tij u bë, pasi në rrugën’’Siri Kodra’’ u kap duke tentuar të vjedhë në banesën e shtetasit H. A., 63 vjeç. Ky shtetas, në përpjekje për t’u larguar, ka goditur shtetasin H. A, duke i shkaktuar dëmtime të lehta, por ska mundur të largohet pasi në afërsi të banesës është kapur në flagrancë nga shërbimet e Policisë. Shtetasi E. M ka qenë i dënuar më parë për veprën penale “Vjedhja me dhunë” në Itali dhe ”Vjedhja, kryer në bashkëpunim, mbetur në tentativë”. Vijon puna për identifikimin dhe kapjen e bashkëpunëtorëve të tjerë, si dhe dokumentimin e vjedhjeve të tjera të ndodhura në Qarkun e Tiranës, në të cilat mund të jetë i implikuar ky shtetas. Materialet iu referuan Prokurorisë së Rrethit Gjyqësor Tiranë, për veprën penale “Vjedhja, e mbetur në tentativë” dhe “Plagosje e lehtë me dashje” .”
