Gjykata e Tiranës ka caktuar masën e sigurisë “Arrest me burg” për Noel Dishin, i cili akuzohet për vrasjen e Vilson Tafçiut në zonën e Astirit në kryeqytet.
Gjykata ka qenë dakord me masën e kërkuar nga prokuroria.
Nga salla e gjyqit, Dishi ka pranuar autorësinë e krimit, ndërsa ka sqaruar edhe arsyet, që e shtynë të qëllonte me armë mikun e fëmijërisë.
“Debatuam dhe Vilsoni më tha se do ta bëj me keq se sa ta kanë bërë. Do të mbaj në bagazh të makinës dhe do ta thyej koken’. Më pas edhe me shau. Tentova të largohesha, por ai vijonte me të njëjtën mënyrë. Atëherë e kam qëlluar. U trondita kur kuptova se çfarë bëra. Pasi e qëllova, u largova. Por asnjëherë nuk kam dashur që të vras shokun tim të fëmijërisë”, tha i pandehuri
Avokatët mbrojtës kanë kërkuar që familja e Dishit të merret në mbrojtje, pasi i druhen një hakmarrje të mundshme nga të afërmit e viktimës.
Vilson Tafçiu u ekzekutua të hënën në mbrëmje nga miku i fëmijërisë në zonën e Astirit.
Autori e thirri jashtë lokalit dhe më pas e qëlloi me tre plumba në gjoks, njëri prej të cilëve e kapi në zemër.
Pas vrasjes, Dishi u largua me shpejtësi nga vendngjarja.
Ai u vetëdorëzua dy ditë më parë, pas bisedimeve të familjarëve të tij me policinë.
