Zhvillimet e fundit në politikë kanë ngjallur debate e polemika të shumta.
Ulja e opozitës dhe mazhorancës në një tryezë për të diskutuar rreth Reformës Zgjedhore nga një pjesë e opinionit është parë si hap pozitiv për zgjedhjen e krizës politike.
Ndërsa pjesës tjetër, kryesisht simpatizantëve të Partisë Demokratike, nuk u ka pëlqyer ky hap.
Por, pavarësisht kësaj, ka mundësi që PD të ndërmarrë edhe hapa më të mëdha.
Për shembull, një takim mes Bashës dhe Ramës?
Të paktën, Damian Gjiknuri kështu ka lënë të kuptohet .
Ai ishte sonte i ftuar në ‘Abc News’, ku i pyetur rreth kësaj çështjeje, ai tha se nuk përjashtohet si mundësi.
Gjiknuri u shpreh se një ditë e tillë do vijë, por Basha ka komplekse të brendshme.
Pjesë nga intervista në studio:
Unë kam pyetur zotin Vasili, të gjithë si opozitë kanë pranuar të ulen në tryezë me ju, përvec akuzës Rama ik, të largohet Gjiknuri, ju vetë si ndiheni?
Unë vetëm jam mësuar me akuza. Nuk është gjë e mirë. Akuza politike ka mbi çdo politikan. Më gjej një që nuk është i akuzuar. Në rastin tim, nuk kam akuzë penale, nëse fjala tërmet përbën vepër penale. Këtu fatkeqësisht ndodhi edhe tërmeti natyror. Mua nuk më bën përshtypje, jam i gatshëm të ndërtoj ura kompromisi. Kam dëshirë të punoj me të gjithë kolegët, pavarësisht akuzave politike.
Ka kundërshtarë dhe skeptikë të kësaj tryeze si zonja Topalli, e kanë me Bashën, mendojnë se është një pakt Rama- Basha…
Shumë aktorë edhe brenda së djathtës duan të kompleksojnë Bashën. Ne mbajmë mend që shumë njerëz kritikuan Ramën për marrëveshjen me Berishën. PD e ngriti shumë stekën, tha fjalën e fundit dhe për këtë arsye pritshmëria ka qenë e lartë. Nga pikëpamja është luftë e brendshme, dhe përdorimi i emrit tim është për të kompleksuar Lulzim Bashën.
Mendoni se do ketë një takim Rama-Basha, të këtyre niveleve?
Kryeministri e ka bërë ftesën kur ra tërmeti, do të thotë që ai e ka shtrirë dorën. Zoti Basha ka krijuar një kompleks për çështje të brendshme. Unë mendoj se një të ardhme natyrshëm që do vijë një moment që palët të ulen. Ky vend është shumë i vogël për tu ndarë, dhe duhet të ketë një dialog në nivel edhe më të madh.
